മണിരത്നം സിനിമ പൊന്നിയിൻ സെൽവനിലെ ഐശ്വര്യാ റായിയുടെ ക്യാരക്ടർ പോസ്റ്റർ പുറത്ത്. ചോള സാമ്രാജ്യത്തിലെ പഴുവൂരിന്റെ രാജ്ഞി നന്ദിനിയായാണ് ഐശ്വര്യ ചിത്രത്തിലെത്തുന്നത്. "പ്രതികാരത്തിന് സുന്ദരമായ മുഖമുണ്ട്" എന്ന ടാഗ് ലൈനുമായാണ് പോസ്റ്റർ പുറത്തുവിട്ടിരിക്കുന്നത്. 

ഇരട്ടവേഷത്തിലാണ് ഐശ്വര്യ റായി ചിത്രത്തിലെത്തുന്നത്. 2018ല്‍ പുറത്തിറങ്ങിയ ഫന്നെ ഖാന്‍ എന്ന ഹിന്ദി ചിത്രത്തിനു ശേഷം ഐശ്വര്യ അഭിനയിക്കുന്ന സിനിമയാണ് പൊന്നിയന്‍ സെൽവൻ. തമിഴിൽ 12 വർഷങ്ങൾക്കു ശേഷമാണ് താരം ഒരു സിനിമയിൽ അഭിനയിക്കുന്നത്. 2010ൽ പുറത്തിങ്ങിയ എന്തിരൻ ആണ് ഐശ്വര്യ അവസാനം അഭിനയിച്ച തമിഴ് സിനിമ.

ഇതിഹാസ സാഹിത്യകാരൻ കൽക്കിയുടെ പ്രസിദ്ധമായ ചരിത്ര നോവലിനെ ആധാരമാക്കിയാണ് മണിരത്നം ഈ ബ്രഹ്മാണ്ഡ ചിത്രം ഒരുക്കുന്നത്. വിക്രമിൻ്റെയും കാർത്തിയുടെയും ക്യാരക്ടർ പോസ്റ്റർ നേരത്തെ പുറത്തുവിട്ടിരുന്നു. വിക്രം, ഐശ്വര്യാ റായ്, തൃഷ, ജയംരവി, കാർത്തി, റഹ്മാൻ, പ്രഭു, ശരത് കുമാർ, ജയറാം, ഐശ്വര്യ ലക്ഷ്മി, പ്രകാശ് രാജ്, ലാൽ, വിക്രം പ്രഭു, പാർത്ഥിപൻ, ബാബു ആന്റണി അശ്വിൻ കാകുമാനു, റിയാസ് ഖാൻ, ശോഭിതാ ദുലിപാല, ജയചിത്ര തുടങ്ങി ഒട്ടേറേ അഭിനേതാക്കൾ ചിത്രത്തിലുണ്ട്. ചിത്രത്തിൽ ആഴ്‌വാർ കടിയൻ നമ്പിയെന്ന കഥാപാത്രത്തെ അവതരിപ്പിക്കുന്നത് നടൻ ജയറാം ആണ്. എആർ റഹ്മാനാണ് സംഗീത സംവിധായകൻ.

മണിരത്‌നത്തിന്റെ തന്നെ മദ്രാസ് ടാക്കീസും ലൈക്ക പ്രൊഡക്ഷൻസും സംയുക്തമായാണ് രണ്ട് ഭാഗങ്ങൾ ഉള്ള ചിത്രം നിർമിച്ചിക്കുന്നത്. ആദ്യ ഭാഗമായ 'പൊന്നിയിൻ സെൽവൻ-1' 2022 സെപ്റ്റംബർ 30 ന് പ്രദർശനത്തിനെത്തുമെന്നാണ് ഔദ്യോഗികമായി പ്രഖ്യാപിച്ചിട്ടുള്ളത്. അഞ്ഞൂറ് കോടി മുതൽമുടക്കിലാണ് ചിത്രം ഒരുങ്ങുന്നത്. 

ഈ വാര്‍ത്ത കൂടി വായിക്കൂ

"ഞങ്ങളുടെ ലാഭത്തിന്റെ ഒരു പങ്ക് മൃ​ഗക്ഷേമത്തിനായി പ്രവർത്തിക്കുന്നവർക്ക്": 777 ചാർലി വിജയം, നന്ദി അറിയിച്ച് രക്ഷിത് ഷെട്ടി 

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ