വിവാഹാഘോഷങ്ങൾക്കിടെ കത്രീന കൈഫിനും വിക്കി കൗശലിനും ഹോട്ടൽ സിക്‌സ് സെൻസസ് ബർവാര ഫോർട്ട് മാനേജ്‌മെന്റിനും എതിരെ പരാതി. വിവാഹത്തിന്റെ പശ്ചാതലത്തിൽ ഇവർ ചൗത്ത് മാതാ ക്ഷേത്രത്തിലേക്കുള്ള വഴി തടഞ്ഞു എന്നു ചൂണ്ടിക്കാട്ടിയാണ് പരാതി. രാജസ്ഥാൻ സ്വദേശിയും അഭിഭാഷകനുമായ നേത്രബിന്ദ് സിംഗ് ജാദൂൺ ആണ് പരാതി നൽകിയത്. 

ക്ഷേത്രത്തിലേക്കുള്ള വഴിയിലാണ് ഹോട്ടൽ സ്ഥിതി ചെയ്യുന്നത്. വിവാഹത്തോടനുബന്ധിച്ച് ആറ് മുതൽ 12 വരെ ഹോട്ടൽ മാനേജ്‌മെന്റ് ക്ഷേത്രത്തിലേക്കുള്ള വഴി അടച്ചിട്ടിരിക്കുകയാണ്. ദിവസേനയുള്ള ആരതിയിൽ പങ്കെടുക്കാൻ നിരവധി ഭക്തർ വരുന്ന ചരിത്ര പ്രധാനമായ ക്ഷേത്രമാണിതെന്ന് അഭിഭാഷകൻ പറയുന്നു. ജനവികാരം കണക്കിലെടുത്ത് വഴി പ്രവർത്തനക്ഷമമാക്കണമെന്നും പരാതിയിയിൽ ആവശ്യപ്പെട്ടു. 

മൂന്ന് ദിവസം നീണ്ടു നിൽക്കുന്ന വിവാഹ ചടങ്ങുകൾക്കാണ് ഇന്ന് തുടക്കംകുറിച്ചിരിക്കുന്നത്. വിവാഹത്തിൽ പങ്കെടുക്കാൻ 120 പേർക്കാണ് ക്ഷണം ലഭിച്ചിരിക്കുന്നത്. വിവാഹത്തിനുള്ള അതിഥികൾ കോവിഡ് വാക്‌സിൻ സ്വീകരിച്ചവരും ആർടി പിസിആർ പരിശോധന നടത്തിയവരും ആയിരിക്കണം.