രാഷ്ട്രീയക്കാരെയോ സർക്കാർ ഉദ്യോഗസ്ഥരെയോ പരിഹസിക്കരുതെന്ന് ആരാധകർക്ക് നിർദേശം നൽകി തമിഴ് സൂപ്പർതാരം വിജയ്. പുതിയ ചിത്രം ബീസ്റ്റിന് റിലീസിന് മുന്നോടിയായിട്ടാണ് നിർദേശവുമായി താരം എത്തിയത്. സമൂഹമാധ്യമങ്ങളിലൂടെയോ ട്രോൾ വിഡിയോയിലൂടെയോ രാഷ്ട്രീയക്കാരെയോ സർക്കാർ ഉദ്യോഗസ്ഥരെയോ പരിഹസിക്കരുതെന്നാണ് താരം പറഞ്ഞത്. ലംഘിക്കുന്നവർക്കെതിനെ നടപടിയുണ്ടാകുമെന്നും വ്യക്തമാക്കിയിട്ടുണ്ട്.

വിജയ് മക്കൾ ഇയക്കം ജനറൽ സെക്രട്ടറി ബിസ്സി ആനന്ദ് ആണ് വിജയ് യുടെ നിർദേശം ആരാധകരോട് പറഞ്ഞത്. നിർദേശം ലംഘിച്ച് പ്രവർത്തിക്കുന്നവരെ സംഘടനയിൽ നിന്ന് പുറത്താക്കുമെന്നും അവർക്കെതിരെ നിയമനടപടി സ്വീകരിക്കുമെന്നും ട്വിറ്ററിലൂടെ പറഞ്ഞു. ഏപ്രിൽ 13നാണ് ചിത്രം തിയറ്ററിൽ എത്തുക. 

അതിനിടെ മുസ്ലീംങ്ങളെ മോശമായി ചിത്രീകരിക്കുന്നു എന്നാരോപിച്ച് ചിത്രത്തിനെതിരെ വിമർശനവും ഉയരുന്നുണ്ട്. ചിത്രത്തിന് കുവൈത്തിൽ പ്രദർശനാനുമതി നിഷേധിച്ചിരുന്നു. അതിനു പിന്നാലെ തമിഴ്നാട്ടിലും നിരോധനം ആവശ്യപ്പെട്ട് മുസ്ലീം സംഘടന രം​ഗത്തെത്തിയിരുന്നു. വിജയ്‌യുടെ കട്ടൗട്ടിൽ ആരാധകർ പാൽ ഒഴിച്ച് പാഴാക്കാനിടയുള്ളതിനാൽ ബീസ്റ്റിന്‌ സ്‌പെഷൽ ഷോ അനുവദിക്കരുതെന്ന്‌ ടിഎൻ മിൽക്ക്‌ അസോസിയേഷനും സംസ്ഥാന സർക്കാരിനോട് ആവശ്യപ്പെട്ടിരുന്നു. 

നെൽസൺ ദിലീപ്കുമാർ സംവിധാനം ചെയ്തിരിക്കുന്ന ചിത്രത്തിൽ സൈനികനായാണ് വിജയ് എത്തുന്നത്. പൂജ ഹെഗ്‌ഡെയാണ് സിനിമയിലെ നായിക. മലയാളി താരം ഷൈൻ ടോം ചാക്കോ, അപർണ ദാസ് എന്നിവർ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. അനിരുദ്ധ് രവിചന്ദറാണ് സംഗീത സംവിധാനം.

ഈ വാര്‍ത്ത കൂടി വായിക്കാം...  'എന്‍റെ തട്ടാന്‍ ഭാസ്‍കരന്‍ ഇതും തട്ടും', ശ്രീനിവാസന് ആശംസകളുമായി രഘുനാഥ് പാലേരി

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്.
ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ