എംപുരാനിലെ ഓരോ കഥാപാത്രങ്ങളെയും അണിയറപ്രവർത്തകർ പ്രേക്ഷകർക്ക് പരിചയപ്പെടുത്തി കൊണ്ടിരിക്കുകയാണ്. ഓരോ കഥാപാത്രങ്ങളും പ്രേക്ഷകർക്ക് നൽകുന്ന പ്രതീക്ഷയും വളരെ വലുതാണ്. ഇപ്പോഴിതാ ചിത്രത്തിലെ 32-ാമത്തെ കഥാപാത്രവും പ്രേക്ഷകർക്ക് മുന്നിലെത്തിയിരിക്കുകയാണ്. ജിജു ജോൺ അവതരിപ്പിക്കുന്ന സഞ്ജീവ് കുമാർ എന്ന കഥാപാത്രത്തെയാണ് പ്രേക്ഷകർക്ക് പരിചയപ്പെടുത്തിയിരിക്കുന്നത്.

"ലൂസിഫറിൽ ഞാൻ സഞ്ജീവ് എന്ന കഥാപാത്രമായാണ് അഭിനയിച്ചത്. സ്റ്റീഫൻ നെടുമ്പള്ളി 45 കോടി കൊടുത്ത് വലിയൊരു പ്രതിസന്ധിയിൽ നിന്ന് കരകയറ്റിയ എൻപി ടിവി ചാനലിന്റെ തലവനാണ് സഞ്ജീവ് എന്ന കഥാപാത്രം. അദ്ദേഹത്തിന്റെ ഭാര്യയും എൻപി ടിവി ചാനലിന്റെ എഡിറ്ററായും അഭിനയിക്കുന്നത് നൈല ഉഷ ആണ്. ലോകമെമ്പാടുമുള്ള മലയാളികൾ വളരെ ആവേശത്തോടെയും ആകാംഷയോടെയും കാത്തിരിക്കുന്ന ഒരു പ്രൊജക്ട് ആണ് എംപുരാൻ. ഞാനും അതേ ആവേശത്തോടെയാണ് എംപുരാൻ റിലീസ് ചെയ്യാനായി കാത്തിരിക്കുന്നത്.

ലൂസിഫറിൽ നിന്ന് എംപുരാനിലേക്ക് എത്തുമ്പോൾ സ്ക്രീൻ സ്‌പേസ് വളരെ കുറവാണ്. കാരണം സിനിമയുടെ കഥാഗതിയിൽ ആ കഥാപാത്രത്തിന് അത്രയും പ്രാധാന്യമേ ഉള്ളൂ. എന്നിരുന്നാലും ലൂസിഫർ സീരിസിന്റെ ഒരു ഭാഗമായി തുടരാൻ സാധിച്ചതിൽ എനിക്ക് വളരെയധികം സന്തോഷമുണ്ട്. എംപുരാൻ എന്ന സിനിമയിൽ ഒരു അഭിനേതാവ് എന്നതിലുപരി ഇതിന്റെ പ്രൊഡക്‌ഷനിൽ ഒരു ഭാഗമാകാൻ സാധിച്ചുവെന്നത് എന്നെ സംബന്ധിച്ചിടത്തോളം വലിയൊരു കാര്യമാണ്.

എംപുരാൻ സിനിമയുടെ അമേരിക്കൻ ഷെഡ്യൂൾ നടക്കുമ്പോൾ അതിന്റെ ലൈൻ പ്രൊഡ്യൂസറായി പ്രവർത്തിച്ചു കൊണ്ട് പ്രൊഡക്ഷൻ നിർവ്വഹിക്കുന്നതിന് എനിക്ക് അവസരം ലഭിച്ചു. അതൊരു വലിയ നേട്ടമായി ഞാൻ കരുതുന്നു. നമ്മുടെ ഇൻഡസ്ട്രിയിൽ ഏറ്റവും മികച്ച പ്രതിഭകളായ മോഹൻലാൽ, മഞ്ജു, ടൊവിനോ തുടങ്ങിയ താരങ്ങൾ, ദേശീയ പുരസ്‌കാരങ്ങൾ കരസ്ഥമാക്കിയ സാങ്കേതിക പ്രവർത്തകർ, ഇതിന്റെയെല്ലാം തലപ്പത്ത് നിൽക്കുന്ന പൃഥ്വിരാജ് സുകുമാരൻ, ഇത്രയും ബ്രില്യന്റ് ആയ ആളുകളോടൊപ്പം സാങ്കേതികമായി ഒന്നിച്ച് പ്രവർത്തിക്കാൻ കഴിഞ്ഞത് ഒരു വലിയ കാര്യമാണ്.

ഈ സിനിമയിലൂടെ എനിക്ക് ഒരുപാട് കാര്യങ്ങൾ പഠിക്കാൻ സാധിച്ചു. പൃഥ്വിരാജ് സുകുമാരനെപ്പറ്റി പറയുകയാണെങ്കിൽ നമ്മുടെ ഇൻഡസ്ട്രിയിൽ മാത്രമല്ല ഇന്ത്യൻ ഇൻഡസ്ട്രിയിൽ തന്നെ കഴിവ് തെളിയിച്ച ഒരു പ്രതിഭയാണ്, അദ്ദേഹം വളരെയധികം ബ്രില്യന്റായ ഒരു സംവിധായകൻ കൂടിയാണ്. അദ്ദേഹത്തിന്റെ ഒരു പ്രവർത്തന രീതി ലൂസിഫർ എന്ന സിനിമയിൽ അഭിനയിക്കുമ്പോൾ എനിക്ക് അടുത്ത് കാണാൻ കഴിഞ്ഞിട്ടുണ്ട്.

എംപുരാനിൽ വന്നപ്പോൾ ആ ഒരു പ്രൊസസ്സ് കാണാൻ മാത്രമല്ല അതിൽ ഒരു ഭാഗമാകാനും ഒരവസരം കിട്ടി. അത് എനിക്കൊരു വലിയ ഹൈലൈറ്റ് ആണ്. അത് എംപുരാൻ എന്ന സിനിമയിൽ എനിക്കേറ്റവും വ്യക്തിപരമായി കിട്ടിയ നേട്ടമാണ്. മാർച്ച് 27 ന് എംപുരാൻ തിയറ്ററിലേക്ക് എത്തുകയാണ്.

ത്രില്ലടിപ്പിക്കാൻ മാർക്കോയും! ഒടിടിയിൽ ഈ ആഴ്ച കാഴ്ചകളുടെ ഉത്സവ മേളം

ലൂസിഫർ നിങ്ങൾ ഇഷ്ടപ്പെട്ടതുപോലെ, ഏറ്റെടുത്തതുപോലെ ഭാഷാഭേദമന്യേ എല്ലാ പ്രേക്ഷകരും എംപുരാൻ എന്ന സിനിമയും ഇഷ്ടപ്പെടുകയും ഏറ്റെടുക്കുകയും ചെയ്യും എന്ന പ്രതീക്ഷയിലാണ് ഞങ്ങൾ. നിങ്ങൾ എല്ലാവർക്കും എംപുരാൻ ആഘോഷിക്കാൻ കഴിയട്ടെ എന്ന് ഞാൻ ആത്മാർഥമായി പ്രതീക്ഷിക്കുന്നു.’’–ജിജു ജോൺ പറഞ്ഞു.