നടി അഹാന കൃഷ്ണയുടെയും ഛായാ​ഗ്രഹകൻ നിമിഷ് രവിയുടെയും വിവാഹ വിശേഷങ്ങൾ ഇതുവരെ കഴിഞ്ഞിട്ടില്ല. ആറ് മാസത്തോളമെടുത്താണ് തന്‍റെ വിവാഹത്തിനായി അഹാന ഓരോ കാര്യങ്ങളും പ്ലാന്‍ ചെയ്‌തത്. അഹാനയെപ്പോലെ തന്നെ അതീവ സുന്ദരികളായിട്ടായിരുന്നു സഹോദരിമാരായ ദിയ, ഇഷാനി, ഹൻസിക എന്നിവരെയും അമ്മ സിന്ധുവിനെയും വിവാ​ഹ ദിവസം കാണാനായത്.

ഓരോരുത്തരും ഒന്നിനൊന്ന് മികച്ചതായിരുന്നുവെങ്കിലും അഹാനയുടെ ഏറ്റവും ഇളയ സഹോദരിയായ ഹൻസിക കൃഷ്ണയാണ് സോഷ്യൽ മീഡിയയുടെ മനം കവരുന്നത്. ഹൻസു എന്ന് വിളിക്കുന്ന ഹൻസികയുടെ ലുക്കിനെ പ്രശംസിച്ചുകൊണ്ട് നിരവധി പേരാണ് സോഷ്യൽ മീഡിയയിൽ എത്തുന്നത്. മഞ്ഞ നിറത്തിലുള്ള ദാവണിയാണ് ഹൻസിക ധരിച്ചത്.

ഒരു സഹോദരിയായിരിക്കാൻ ഏറ്റവും മനോഹരമായ ദിവസം എന്നാണ് തന്റെ ചിത്രങ്ങൾ‌ക്കൊപ്പം ഹൻസിക കുറിച്ചത്. മേക്കപ്പും സ്റ്റെെലിങ്ങും കൂടിയായപ്പോൾ ഹൻസികയുടെ ലുക്ക് പൂർണമായി. വളരെ നന്നായിട്ടുണ്ട് എന്നാണ് ഹൻസികയുടെ ചിത്രങ്ങൾക്ക് അഹാന നൽകിയ കമന്റ്.

'കല്യാണം ഹൻസു കൊണ്ട് പോയി.. എല്ലാവരുടെ ഡ്രെസ്സിനെക്കാളും അടിപൊളി ആയിട്ടുണ്ട്', 'കൂട്ടത്തിൽ ഏറ്റവും മികച്ചത്', 'ദിയയുടെ കല്യാണത്തിന് അഹാനയും, അഹാനയുടെ കല്യാണത്തിന് ഹൻസികയും തൂക്കി'- എന്നൊക്കെയാണ് സോഷ്യൽ മീഡിയയിൽ നിറയുന്ന കമന്റുകൾ.

ഇതുപോലെ സ്വപ്നതുല്യമായ വിവാഹം വേറെയില്ല എന്നാണ് ഹൻസിക അഹാനയുടെ വിവാഹചിത്രങ്ങൾക്ക് കമന്റായി കുറിച്ചത്. അതേസമയം അമല്‍ നീരദ് ചിത്രം 'ബാച്ച്ലർ പാർട്ടി 2'വിൽ നായികയായി ഹൻസിക എത്തുന്നു എന്ന തരത്തിലും റിപ്പോർട്ടുകൾ വന്നിരുന്നു.