ഡൊമിനിക് ആൻഡ് ദ് ലേഡീസ് പഴ്സ് തിയറ്ററുകളിൽ വിജയകരമായി പ്രദർശനം തുടരുകയാണ്. ചിത്രത്തിന്റെ വിജയാഘോഷം ഇന്ന് നടന്നിരുന്നു. ചിത്രത്തിലെ ആക്ഷൻ രം​ഗങ്ങളേക്കുറിച്ച് മമ്മൂട്ടി പറഞ്ഞ വാക്കുകളാണിപ്പോൾ സോഷ്യൽ മീഡിയ ഏറ്റെടുത്തിരിക്കുന്നത്. വാർത്താ സമ്മേളനത്തിൽ സംസാരിക്കുകയായിരുന്നു മമ്മൂട്ടി. "സാധാരണ കാണാറുള്ള ഒരു ഹീറോയല്ല ഡൊമിനിക്കിലുള്ളത്.

പിരിച്ചുവിടപ്പെട്ട ഒരു പൊലീസുകാരനാണ്. അയാൾക്ക് അതിന്റേതായ ബുദ്ധിമുട്ടും ഫാമിലി പ്രശ്നങ്ങളുമൊക്കെയുണ്ട്. പിന്നെ അയാളൊരു ഡയബറ്റിക് രോ​ഗിയാണ്. എല്ലാ ഹീറോയ്ക്കും ​ഗുസ്തിയൊന്നും ചെയ്യാൻ ആകില്ലല്ലോ. ഡൊമിനിക് അങ്ങനെയൊരു ​ഗുസ്തിക്കാരനൊന്നുമല്ല. ജീവൻ രക്ഷാർഥമുള്ള ഫൈറ്റുകൾ മാത്രമേ അയാൾക്കുള്ളൂ.

അതുകൊണ്ടാണ് ഇതിലെ ഫൈറ്റുകളൊക്കെ വളരെ ക്രിസ്പ് ആയത്. ഡൊമിനിക് വളരെ റിയലിസ്റ്റിക് ആയിട്ടുള്ള കഥാപാത്രമാണ്. ​​ഗൗതം സാർ പറഞ്ഞിരുന്നു നമുക്ക് വേണമെങ്കിൽ ഫൈറ്റൊക്കെ കുറച്ചു കൂടി ആക്കാം, സ്വാ​ഗ് കൊണ്ടുവരാമെന്നൊക്കെ. ഞാൻ പറഞ്ഞു, അതു വേണ്ടല്ലോ നമ്മൾ സ്വാ​ഗ് ഒരുപാട് കണ്ടതല്ലേ എന്ന്. അതൊരു വ്യത്യസ്തമായ കഥാപാത്രമായിക്കോട്ടെ എന്ന്.

'ഡൊമിനിക് ആൻഡ് ദ് ലേഡീസ് പഴ്സി'നെ പ്രശംസിച്ച് കാർത്തിക് സുബ്ബരാജ്; നന്ദി പറഞ്ഞ് മമ്മൂട്ടി

ഒരു സാധാരണ മനുഷ്യനായിക്കോട്ടെ, ഒരു സാധാരണക്കാരൻ ചെയ്യുന്നതൊക്കെ ചെയ്യുന്നതായിക്കോട്ടെ എന്ന് വിചാരിച്ചാണ് ആ കഥാപാത്രത്തെ അങ്ങനെ ആക്കിയത്. അത് സ്വീകരിക്കപ്പെടുക എന്ന് പറയുന്നത് വലിയ കാര്യമാണ്".- മമ്മൂട്ടി പറഞ്ഞു. ​ഗൗതം വാസുദേവ് മേനോനാണ് ചിത്രം സംവിധാനം ചെയ്തത്. ഗോകുൽ സുരേഷ്, സുഷ്മിത ഭട്ട്, വിജി വെങ്കടേഷ്, വിനീത് തുടങ്ങി നിരവധി താരങ്ങൾ ചിത്രത്തിൽ പ്രധാന വേഷത്തിലെത്തി.