തെന്നിന്ത്യയൊട്ടാകെ കാത്തിരിക്കുന്ന ചിത്രമാണ് രജനികാന്തിന്റെ ജയിലർ 2. നെൽസൺ ദിലീപ്കുമാർ സംവിധാനം ചെയ്യുന്ന ചിത്രത്തിനായി വാനോളം പ്രതീക്ഷയോടെയാണ് ആരാധകർ കാത്തിരിക്കുന്നത്. 2023 ൽ പുറത്തിറങ്ങിയ ജയിലർ എന്ന ചിത്രത്തിന്റെ തുടർഭാ​ഗമായാണ് ജയിലർ 2 ഒരുങ്ങുന്നത്. ഇപ്പോഴിതാ ചിത്രത്തിൽ ഒരു ഐറ്റം ഡാൻസുമായി നടി നോറ ഫത്തേഹിയും ഉണ്ടെന്നാണ് പുറത്തുവരുന്ന വിവരം.

നിലവിൽ നോറ ഈ പാട്ടിന്റെ ചിത്രീകരണത്തിനായി ചെന്നൈയിലാണെന്നാണ് പുറത്തുവരുന്ന വിവരം. അനിരുദ്ധ് രവിചന്ദർ ആണ് ചിത്രത്തിന് സം​ഗീതമൊരുക്കുന്നത്. അതേസമയം രജനിയും നോറയും ഒന്നിക്കുന്ന പാട്ടിനെക്കുറിച്ചുള്ള മറ്റു വിവരങ്ങളൊന്നും പുറത്തുവന്നിട്ടില്ല.

തെന്നിന്ത്യൻ സ്റ്റൈലിലാണ് പാട്ട് ഒരുക്കിയിരിക്കുന്നതെന്ന് റിപ്പോർട്ടുകൾ സൂചിപ്പിക്കുന്നുണ്ട്. രജനികാന്തിനൊപ്പം എട്ട് ദിവസത്തെ ഷൂട്ടിങ്ങിനാണ് നോറ ഡേറ്റ് കൊടുത്തിരിക്കുന്നത് എന്നാണ് വിവരം. അതേസമയം ജയിലറിൽ കാവാല എന്ന ഐറ്റം ഡാൻസിൽ രജനികാന്തിനൊപ്പം തമന്നയാണ് എത്തിയത്.

ഈ പാട്ട് സോഷ്യൽ മീ‍ഡിയയിൽ വൻ തരം​ഗമായി മാറുകയും ചെയ്തു. ആക്ഷൻ-കോമഡി ഴോണറായാണ് ജയിലർ 2 ഒരുങ്ങുന്നത്. അടുത്ത വർഷം ജൂൺ 12 ന് ചിത്രം റിലീസ് ചെയ്യുമെന്നാണ് വിവരം. നടി വിദ്യ ബാലനും ചിത്രത്തിൽ ഒരു പ്രധാന വേഷത്തിലെത്തുന്നുണ്ടെന്ന തരത്തിൽ കഴിഞ്ഞ ദിവസം റിപ്പോർട്ടുകൾ പുറത്തുവന്നിരുന്നു. മോഹൻലാലും ചിത്രത്തിൽ അതിഥി വേഷത്തിലെത്തും.