മലയാളത്തിലെ എവര്‍ഗ്രീന്‍ ഹിറ്റുകളിലൊന്നാണ് കിലുക്കം. ഇന്നും മലയാളികളെ ചിരിപ്പിക്കുന്ന സിനിമ. എത്ര കണ്ടാലും മലയാളികള്‍ക്ക് മടുക്കാത്ത സിനിമ. മോഹന്‍ലാല്‍, രേവതി, ജഗതി ശ്രീകുമാര്‍, തിലകന്‍, ഇന്നസെന്റ് തുടങ്ങിയ താരങ്ങള്‍ അണിനിരന്ന സിനിമയുടെ സംവിധാനം പ്രിയദര്‍ശന്‍ ആണ്. ചിത്രത്തിലെ രേവതിയുടെ പ്രകടനം ഇന്നും ചര്‍ച്ചയാകുന്നതാണ്. എന്നാല്‍ രസകരമായൊരു വസ്തുത എന്തെന്നാല്‍ കിലുക്കത്തില്‍ രേവതിയ്ക്ക് മുമ്പ് മറ്റൊരു നടിയെയായിരുന്നു കാസ്റ്റ് ചെയ്തിരുന്നത്.

അക്കാലത്ത് തെന്നിന്ത്യയാകെ നിറഞ്ഞു നിന്നിരുന്ന നടിയായിരുന്നു അമല. തെലുങ്കില്‍ നിന്നും മലയാളത്തിലെത്തിയ അമലയെയായിരുന്നു പ്രിയദര്‍ശന്‍ ആദ്യം മോഹന്‍ലാലിന്റെ നായികയായി കിലുക്കത്തില്‍ കാസ്റ്റ് ചെയ്തിരുന്നത്. എന്നാല്‍ പിന്നീട് ചിത്രം രേവതിയിലേക്ക് എത്തുകയായിരുന്നു. രസകരമായ ആ കഥ പങ്കുവെക്കുന്നൊരു സോഷ്യല്‍ മീഡിയ പോസ്റ്റ് ചര്‍ച്ചയായി മാറുകയാണ്. കിലുക്കത്തില്‍ നിന്നും അമലയെ മാറ്റിയെന്ന പഴയൊരു വാര്‍ത്തയുടെ പത്ര കട്ടിങ് പങ്കുവെക്കുന്ന പോസ്റ്റാണ് വൈറലാകുന്നത്.

1991 ല്‍ പുറത്തിറങ്ങിയ രണ്ട് സിനിമകളാണ് കിലുക്കവും ഉള്ളടക്കവും. രണ്ടിലും നായകന്‍ മോഹന്‍ലാല്‍ ആയിരുന്നു. കിലുക്കം ആ വര്‍ഷത്തെ ഏറ്റവും വലിയ ഹിറ്റായപ്പോള്‍ ഉള്ളടക്കത്തിലൂടെ മോഹന്‍ലാലിന് മികച്ച നടനുള്ള സംസ്ഥാന ചലച്ചിത്ര പുരസ്‌കാരവും ലഭിച്ചു. ഉള്ളടക്കത്തിലൂടെയാണ് കമല്‍ മികച്ച സംവിധായകനുള്ള ആദ്യത്തെ സ്റ്റേറ്റ് അവാര്‍ഡ് സ്വന്തമാക്കുന്നത്. അമലയായിരുന്നു ചിത്രത്തിലെ നായിക. രസകരമായൊരു വസ്തുത എന്തെന്നാല്‍ ഉള്ളടക്കത്തില്‍ കമല്‍ ആദ്യം നായികയായി തീരുമാനിച്ചിരുന്നത് രേവതിയെയായിരുന്നു.

കിലുക്കത്തിന്റെ കഥ പ്രിയദര്‍ശന്‍ അമലയോട് പറയുകയും അമലയ്ക്ക് ഇഷ്ടപ്പെടുകയും ചെയ്തിരുന്നു. എന്നാല്‍ ചിത്രീകരണം ആരംഭിക്കും മുമ്പ് വ്യക്തിപരമായ കാരണങ്ങളാല്‍ അമല ചിത്രത്തില്‍ നിന്നും സ്വയം പിന്മാറി. ഇതോടെ ഷൂട്ടിങ് മുടങ്ങുമെന്നായി. തുടര്‍ന്നാണ് പ്രിയദര്‍ശന്‍ രേവതിയെ സമീപിക്കുന്നത്. കിലുക്കം രേവതിയുടെ കരിയറിലെ ഏറ്റവും വലിയ ഹിറ്റും എക്കാലവും ഓര്‍ത്തിരിക്കുന്ന കഥാപാത്രവുമായി മാറി.

അതേസമയം ഉള്ളടക്കത്തിനായി കമലും തിരക്കഥാകൃത്ത് പി ബാലചന്ദ്രനും രേവതിയെ സമീപിച്ചിരുന്നു. കഥ ഇഷ്ടപ്പെട്ടുവെങ്കിലും രേവതി സിനിമ നിരസിച്ചു. കിലുക്കത്തിലെ തന്റെ കഥാപാത്രവുമായി സാമ്യം തോന്നിയതു കൊണ്ടായിരുന്നു രേവതിയുടെ പിന്മാറ്റം. തുടര്‍ന്നാണ് കമല്‍ അമലയെ സമീപിക്കുന്നത്. കഥ കേട്ടയുടനെ തന്നെ അമല ഓക്കെ പറഞ്ഞു. അമലയുടെ കരിയറിലെ ഏറ്റവും മികച്ച പ്രകടനങ്ങളിലൊന്നായി ചിത്രം മാറുകയും ചെയ്തു. ഒരേ വര്‍ഷം തന്നെ പുറത്തിറങ്ങിയ, രണ്ട് സൂപ്പര്‍ നായികമാരുടെ കരിയറിലെ ഏറ്റവും മികച്ച പ്രകടനങ്ങളായി മാറിയ സിനിമകള്‍ക്കിടയിലെ ഈ കൊടുക്കല്‍ വാങ്ങല്‍ സോഷ്യല്‍ മീഡിയയില്‍ ചര്‍ച്ചയായി മാറുകയാണ്.