ഗായികയും അവതാരകയുമായ റിമി ടോമി വിവാഹിതയായി. മുംബൈയിലെ ഡോംബിവലിയിൽ വച്ചായിരുന്നു ചടങ്ങുകൾ. ഫിറ്റ്നസ് ട്രെയിനറും മുംബൈ മലയാളിയുമായ ലിബിൻ മാത്യുവിനെയാണ് വിവാഹം ചെയ്തത്. ഡോംബിവലിയിലെ മാർ തോമ പള്ളിയിൽ നടന്ന ചടങ്ങിൽ കുടുംബാംഗങ്ങളും അടുത്ത സുഹൃത്തുക്കളും പങ്കെടുത്തു.

എല്ലാം ഭം​ഗിയായി നടന്നുവെന്നും ഭയങ്കര സന്തോഷമുണ്ടെന്നും റിമി വിവാഹശേഷം മാധ്യമങ്ങളോട് പറഞ്ഞു. വളരെയധികം സന്തോഷത്തിലാണെന്ന് ലിബിനും പ്രതികരിച്ചു. "എല്ലാവരും പ്രാർഥിക്കണം, എല്ലാം ഭം​ഗിയായി നടന്നു. കരച്ചിൽ വരുന്നു, ഭയങ്കര സന്തോഷം". - റിമി ടോമി പറഞ്ഞു.

അടുത്തിടെയാണ് വിവാഹിതയാകാൻ ഒരുങ്ങുന്നുവെന്ന സന്തോഷ വാർത്ത റിമി ടോമി ആരാധകരുമായി പങ്കുവച്ചത്. വിവാഹ ശേഷം ലിബിനൊപ്പം മുംബൈയിലായിരിക്കും താമസമെന്നും റിമി അറിയിച്ചിരുന്നു. ബാന്ദ്രയിൽ ഫ്ലാറ്റും ഗായിക സ്വന്തമാക്കിയിട്ടുണ്ട്.