ഒരു കാലത്ത് തെന്നിന്ത്യൻ സിനിമകളിൽ നിറഞ്ഞു നിന്ന നടിമാരിലൊരാളാണ് സിമ്രാൻ. വിവാഹത്തിന് പിന്നാലെയാണ് സിമ്രാൻ സിനിമാ മേഖലയിൽ നിന്ന് ചെറിയ ഇടവേളയെടുത്തത്. കുറച്ചു നാളത്തെ ബ്രേക്കിന് ശേഷം സിമ്രാൻ വീണ്ടും സിനിമയിൽ സജീവമായിരിക്കുകയാണ്. അടുത്തിടെ സിമ്രാൻ അഭിനയിച്ച ടൂറിസ്റ്റ് ഫാമിലി എന്ന ചിത്രം വലിയ വിജയമായി മാറുകയും ചെയ്തിരുന്നു.

ഇപ്പോഴിതാ സൂപ്പർ സ്റ്റാർ രജനികാന്തിനെ കണ്ടുമുട്ടിയതിന്റെ സന്തോഷം പങ്കുവച്ചിരിക്കുകയാണ് സിമ്രാൻ. രജനികാന്തിന്റെ വീട്ടിലെത്തിയാണ് സിമ്രാൻ അദ്ദേഹത്തെ കണ്ടത്. ചില കൂടിക്കാഴ്ചകൾ കാലാതീതമാണെന്നും സൂപ്പർ സ്റ്റാറിനൊപ്പം നല്ല നിമിഷങ്ങൾ പങ്കുവയ്ക്കാൻ കഴിഞ്ഞതിൽ സന്തോഷമുണ്ടെന്നും സിമ്രാൻ എക്സിൽ കുറിച്ചു.

മാത്രമല്ല കൂലിയുടെയും ടൂറിസ്റ്റ് ഫാമിലിയുടെയും വിജയം ഈ കൂടിക്കാഴ്ച സ്പെഷ്യലാക്കിയെന്നും സിമ്രാൻ കുറിച്ചിട്ടുണ്ട്. രജനികാന്തിനോട് തനിക്ക് ഒരു സീക്രട്ട് ക്രഷ് ഉണ്ടായിരുന്നുവെന്ന് സിമ്രാൻ മുൻപൊരു അഭിമുഖത്തിൽ തുറന്നു പറഞ്ഞിരുന്നു. രജനികാന്ത് അഭിനയിക്കുമ്പോൾ സെറ്റിൽ ആരും കാണാതെ ഒരു മൂലയിൽ പോയി അദ്ദേഹത്തെ നോക്കിയിരിക്കുമായിരുന്നുവെന്നും താൻ ഇപ്പോഴും ഒരു രജനി ഫാൻ ആണെന്നുമാണ് സിമ്രാൻ അന്ന് പറഞ്ഞത്.

ഇപ്പോൾ സോഷ്യൽ മീഡിയയിൽ ഈ ചിത്രമാണ് ചർച്ചാവിഷയം. കാർത്തിക് സുബ്ബരാജ് സംവിധാനം ചെയ്ത പേട്ട എന്ന ചിത്രത്തിലാണ് ഇരുവരും ഒടുവിൽ ഒന്നിച്ചഭിനയിച്ചത്. തിയറ്ററുകളിലും ഒടിടിയിലും മികച്ച പ്രതികരണമാണ് സിമ്രാൻ അഭിനയിച്ച ടൂറിസ്റ്റ് ഫാമിലി നേടിയത്.

അതേസമയം രജനികാന്തിന്റെ കൂലി ആ​ഗോളതലത്തിൽ 450 കോടി നേടിയെന്നാണ് പുറത്തുവരുന്ന റിപ്പോർട്ടുകൾ. ഇന്ത്യയിൽ നിന്ന് മാത്രം 235 കോടിയിലേറെ ചിത്രം ഇതിനോടകം നേടിക്കഴിഞ്ഞു. നെൽസൺ ദിലീപ്കുമാർ സംവിധാനം ചെയ്യുന്ന ജയിലർ 2 ആണ് രജനികാന്തിന്റേതായി അണിയറയിൽ ഒരുങ്ങുന്ന ചിത്രം.