പിന്നണി ​ഗായിക രാധിക തിലക് വിടപറഞ്ഞിട്ട് ഇന്നേക്ക് 10 വർഷം പൂർത്തിയാവുകയാണ്. മലയാളികൾ എക്കാലവും ഓർത്തുവയ്ക്കുന്ന ഒരുപിടി ​ഗാനങ്ങൾ സമ്മാനിച്ചാണ് രാധിക ലോകത്തോട് വിട പറഞ്ഞത്. മായാമഞ്ചലിൽ, കാനനക്കുയിലേ, ദേവസം​ഗീതം നീയല്ലേ, മഞ്ഞക്കിളിയുടെ തുടങ്ങിയ ​ഗാനങ്ങളിലൂടെയാണ് രാധിക തിലക് ശ്രദ്ധേയായത്.

രാധികയുടെ ഓർമ പങ്കുവച്ച് ​ഗായിക സുജാത ഇന്ന് ഹൃദ്യമായ ഒരു കുറിപ്പും പങ്കുവച്ചിരുന്നു. രാധികയുടെ അടുത്ത ബന്ധുക്കൾ കൂടിയാണ് ​ഗായകരായ ജി വേണു​ഗോപാലും സുജാതയും. ഇപ്പോഴിതാ ​രാധികയ്ക്കായി ​ഗാനാഞ്ജലി ഒരുക്കിയിരിക്കുകയാണ് വേണു​ഗോപാലും സുജാതയും.

'രാധികയുടെ വിയോഗത്തിന് ഇന്ന് പത്താമാണ്ട് ! ഞങ്ങളുടെ സംഗീത കുടുംബത്തിലെ രണ്ടും മൂന്നും തലമുറക്കാർ, സുജു, ഞാൻ, ശ്വേത, അരവിന്ദ്, ദേവിക. ഞങ്ങൾ രാധികയ്ക്കൊരു ഗാനാഞ്ജലി ഒരുക്കുന്നു. ഞങ്ങളുടെ പാട്ടുകളിലൂടെ'.- എന്നാണ് വിഡിയോ പങ്കുവച്ച് വേണു​ഗോപാൽ ഫെയ്സ്ബുക്കിൽ കുറിച്ചിരിക്കുന്നത്.

ദ് ഫാമിലി മെഡ്ലി എന്നാണ് മ്യൂസിക് വിഡിയോയ്ക്ക് പേര് കൊടുത്തിരിക്കുന്നത്. അർബുദത്തെ തുടർന്ന് ചികിത്സയിലിരിക്കെ 2015 സെപ്റ്റംബർ 20 നാണ് രാധിക തിലക് അന്തരിച്ചത്. 1989 ൽ പുറത്തിറങ്ങിയ സംഘ​ഗാനം എന്ന ചിത്രത്തിലൂടെയാണ് രാധിക സിനിമയിൽ അരങ്ങേറ്റം കുറിക്കുന്നത്.

മലയാളത്തിൽ എൺപതോളം സിനിമകളിൽ രാധിക പാടിയിട്ടുണ്ട്. "നിന്നെ ഓർക്കാത്ത ഒരു ദിവസം പോലും ഇല്ല മോളെ..." എന്നാണ് രാധികയ്ക്കൊപ്പമുള്ള ഒരു പഴയകാല ചിത്രം പങ്കുവച്ച് സുജാത കുറിച്ചിരിക്കുന്നത്.