മലയാളികള്‍ക്ക് സുപരിചിതനായ നടനാണ് സുരേഷ് കൃഷ്ണ. രണ്ട് പതിറ്റാണ്ടിലേറെയായി മലയാള സിനിമയില്‍ സുരേഷ് കൃഷ്ണയുണ്ട്. കരിയറിന്റെ ഭൂരിഭാഗവും വില്ലന്‍ വേഷങ്ങളാണ് ചെയ്തതെങ്കിലും പിന്നീട് കോമഡിയിലും ക്യാരക്ടര്‍ റോളിലുമെല്ലാം കയ്യടി നേടാന്‍ സുരേഷ് കൃഷ്ണയ്ക്ക് സാധിച്ചു. ഇന്ന് സോഷ്യല്‍ മീഡിയയിലെ കണ്‍വിന്‍സിംഗ് സ്റ്റാര്‍ ആണ് സുരേഷ് കൃഷ്ണ.

മലയാളത്തിന് പുറമെ മറ്റ് ഭാഷകളിലും സുരേഷ് കൃഷ്ണ അഭിനയിച്ചിട്ടുണ്ട്. സുരേഷ് കൃഷ്ണ അഭിനയിച്ച തമിഴ് ചിത്രമാണ് പൊട്ട് അമ്മന്‍. ഈ ചിത്രത്തിലെ സുരേഷ് കൃഷ്ണയുടെ വേഷപ്പകര്‍ച്ച പലപ്പോഴും ചര്‍ച്ചയായി മാറാറുണ്ട്. കണ്ടാല്‍ മനസിലാകാത്ത രൂപത്തിലേക്കുള്ള ആ മാറ്റത്തിന് പിന്നില്‍ പക്ഷെ ഒരുപാട് വേദനകള്‍ ഉണ്ട്. ജിഞ്ചര്‍ മീഡിയ എന്റര്‍ടെയ്ന്‍മെന്റ് യൂട്യൂബ് ചാനലിന് നല്‍കിയ അഭിമുഖത്തില്‍ അതേക്കുറിച്ച് സംസാരിക്കുന്നുണ്ട് സുരേഷ് കൃഷ്ണ.

''പൊട്ടു അമ്മന്‍ സിനിമയില്‍ മേക്കപ്പ്മാന്‍ ചെയ്ത സാധനം ഒട്ടും ശരിയാകുന്നില്ല. അരമണിക്കൂര്‍ പോലും നില്‍ക്കുന്നില്ല. സ്‌പ്രെഡ് ആയി പോവുകയാണ്. എന്റെ മനസില്‍ തോന്നിയൊരു ഐഡിയ ഞാന്‍ സംവിധായകനോട് പറഞ്ഞപ്പോള്‍ നോക്കാം എന്ന് അദ്ദേഹം പറഞ്ഞു. ടിഷ്യൂ പേപ്പര്‍ അമ്പിളി അമ്മാവന്റെ ഷേപ്പില്‍ കട്ട് ചെയ്യും. സ്പിരിറ്റ് ഗം കണ്ണിന്റെ താഴെ ഭാഗത്തായി തേക്കും. അതിന് മേലെ ആ പേപ്പര്‍ ഒട്ടിക്കും. വീണ്ടും മുകളില്‍ ഗം തേക്കും. അത് ചുരുക്കി പിടിച്ച് ഡ്രൈ ആക്കും. പിന്നെ സ്റ്റിക് ഇട്ട് മാച്ച് ചെയ്തു. ഭയങ്കര ലുക്ക് കിട്ടി. പക്ഷെ ചെയ്ത ഏറ്റവും വലിയ മണ്ടത്തരമായിരുന്നു അത്'' സുരേഷ് കൃഷ്ണ പറയുന്നു.

''എട്ട്-പത്ത് ദിവസം കഴിഞ്ഞപ്പോഴേക്കും കണ്ണിന് താഴെ പൊട്ടി, പഴുത്ത് ലിക്വിഡ് വരാന്‍ തുടങ്ങി. ഡോക്ടറെ കാണിച്ചു. അന്ന് ആര്‍ക്കും അറിയില്ല. അതിനാല്‍ എന്താണ് ചെയ്യുന്നതെന്ന് ഡോക്ടര്‍ ചോദിച്ചു. നടനാണ്, മേക്കപ്പില്‍ ചെറുതായൊരു പണി കിട്ടിയതാണെന്ന് ഞാന്‍ പറഞ്ഞു. അയാള്‍ എന്നെ തെറിയോട് തെറിയായിരുന്നു. ഒരു നടന് ഏറ്റവും പ്രധാനപ്പെട്ടതാണ് കണ്ണ്. അത് നശിപ്പിക്കരുതെന്ന് പറഞ്ഞു. പക്ഷെ എന്ത് ചെയ്യാനാകും. കണ്ടിന്യുവിറ്റി ആയിപ്പോയി. അതിന് ശേഷം അഞ്ചാറുമാസം ഈ സിനിമയുടെ ഷൂട്ടുണ്ടായിരുന്നു. ഒന്ന് ഉണങ്ങി വരുമ്പോഴേക്കും വീണ്ടും മേക്കപ്പിടും'' എന്നും സുരേഷ് കൃഷ്ണ പറയുന്നു.

സുരേഷ് കൃഷ്ണയുടെ ആദ്യ തമിഴ് ചിത്രമാണ് പൊട്ടു അമ്മന്‍. അദ്ദേഹത്തിന്റെ ആദ്യ സിനിമയും ഇത് തന്നെയാണ്. പിന്നീടാണ് കരുമാടിക്കുട്ടനിലൂടെ മലയാളത്തിലെത്തുന്നത്. മരണമാസ് ആണ് സുരേഷ് കൃഷ്ണുടേതായി ഒടുവില്‍ പുറത്തിറങ്ങിയ സിനിമ. ഫ്ളാസ്ക്, രവീന്ദാ നീ എവിടെ? എന്നിവയാണ് റിലീസ് കാത്തു നില്‍ക്കുന്ന സിനിമകള്‍.