ഒട്ടേറെ ആരാധകരുള്ള ഒരു പരമ്പരയാണ് ഫാമിലി മാൻ. 2019 ലാണ് ഫാമിലി മാൻ സീരിസ് റിലീസ് ചെയ്യുന്നത്. ഇപ്പോഴിതാ സീരിസിന്റെ മൂന്നാമത്തെ സീസൺ റിലീസിനൊരുങ്ങുകയാണ്. നവംബർ 21 മുതൽ ആമസോൺ പ്രൈമിലൂടെ സീരിസിന്റെ സ്ട്രീമിങ് ആരംഭിക്കും.

ആദ്യ സീസണില്‍ നീരജ് മാധവും രണ്ടാം സീസണിൽ സാമന്തയും നെഗറ്റീവ് വേഷത്തിലെത്തി ഞെട്ടിച്ചപ്പോൾ മൂന്നാം സീസണിൽ ജയ്‌ദീപ് അഹ്ലാവത്തും നിമത്ര് കൗറുമാണ് നെ​ഗറ്റീവ് വേഷങ്ങളിലെത്തുന്നത്. മനോജ് ബാജ്പേയ്, ഷരിബ് ഹഷ്മി, പ്രിയ മണി തുടങ്ങിയവർ അതേ വേഷങ്ങളിൽ തന്നെ എത്തും.

രാജ് നിധിമോരു, ഡി കെ കൃഷ്ണ എന്നിവർ സംവിധായകരും നിർമാതാക്കളുമായ സീരിസിന്റെ ആദ്യ രണ്ട് സീസണുകളും സൂപ്പർ ഹിറ്റായിരുന്നു. നാഷണൽ ഇൻവസ്റ്റിഗേഷൻ ഏജൻസി(എൻഐഎ)യുടെ സാങ്കൽപിക ബ്രാ‌‍ഞ്ചായ ത്രട്ട് അനാലിസിസ് ആൻഡ് സർവേലൻസ് സെല്ലിലെ ​അന്വേഷണ ഉദ്യോഗസ്ഥനായ ശ്രീകാന്ത് തിവാരി എന്ന കഥാപാത്രമായാണ് മനോജ് ബാജ്പേയ് എത്തുന്നത്.