ചെന്നൈ: വിഖ്യാത ഫിലിംമേക്കർ സിം​ഗീതം ശ്രീനിവാസ റാവു (94) അന്തരിച്ചു. ചെന്നൈയിലെ കാവേരി ആശുപത്രിയിൽ വാർധക്യസഹജമായ അസുഖങ്ങളെ തുടർന്ന് ചികിത്സയിലിരിക്കെ ശനിയാഴ്ച രാത്രിയായിരുന്നു അന്ത്യം. നാ​ഗ് അശ്വിൻ നിർമിച്ച് 'സിങ് ​ഗീതം' എന്ന ചിത്രമാണ് റാവു അവസാനമായി സംവിധാനം ചെയ്തത്.

94-ാം വയസിലും ഒരു സിനിമ സംവിധാനം ചെയ്തു എന്നത് സിനിമാ ലോകത്തുനിന്നും പ്രേക്ഷകരിൽ നിന്നും അദ്ദേഹത്തിന് വലിയ രീതിയിലുള്ള പ്രശംസ നേടിക്കൊടുത്തിരുന്നു. വ്യത്യസ്തവും നൂതനവുമായ കഥപറച്ചിൽ രീതികളിലൂടെ ഇന്ത്യൻ സിനിമയിലെ ഏറ്റവും മികച്ച സംവിധായകരിൽ ഒരാളായാണ് സിംഗീതം ശ്രീനിവാസ റാവു അറിയപ്പെടുന്നത്.

തെലുങ്ക് സിനിമയിൽ ടൈം ട്രാവൽ ആശയം അവതരിപ്പിച്ച ‘ആദിത്യ 369’ എന്ന സയൻസ് ഫിക്ഷൻ കോമഡി ചിത്രം, ഫാന്റസി-ഫോക്‌ലോര്‍ വിഭാഗത്തിൽ പെട്ട ‘ഭൈരവ ദ്വീപം’, സംഭാഷണങ്ങളില്ലാത്ത ചിത്രമായ ‘പുഷ്പക വിമാനം’ തുടങ്ങി കാലത്തെ അതിജീവിച്ച നിരവധി ക്ലാസിക് സിനിമകൾ അദ്ദേഹം സൃഷ്ടിച്ചിട്ടുണ്ട്. വിവിധ ഭാഷകളിലായി അറുപതിലധികം ചിത്രങ്ങൾ സംവിധാനം ചെയ്തിട്ടുണ്ട്.

തെലുങ്ക് സിനിമയ്ക്ക് പുറമെ കന്നഡ, ഹിന്ദി ചലച്ചിത്രരംഗത്തും സജീവമായി പ്രവർത്തിച്ച സിംഗീതം, വ്യത്യസ്തമായ പ്രമേയങ്ങളും ആഖ്യാനശൈലികളും ഒരേപോലെ കൈകാര്യം ചെയ്യുന്നതിൽ മികവ് തെളിയിച്ചിരുന്നു. 1931 സെപ്റ്റംബർ 21-ന് ആന്ധ്രാ പ്രദേശിലെ ഗുഡൂരിൽ ജനിച്ച സിംഗീതം, പ്രശസ്ത ചലച്ചിത്രകാരൻ എൽവി പ്രസാദിന്റെ സഹായിയായാണ് തന്റെ സിനിമാ ജീവിതം ആരംഭിച്ചത്.

കൂടുതല്‍ സിനിമ വാര്‍ത്തകള്‍ക്കായി വാട്സ്ആപ്പ് ഗ്രൂപ്പില്‍ അംഗമാകൂ

ഇവിടെ ക്ലിക്ക് ചെയ്യുക

ദേശീയ ചലച്ചിത്ര പുരസ്കാരം, നന്ദി അവാർഡുകൾ, കർണാടക സംസ്ഥാന ചലച്ചിത്ര പുരസ്കാരം, ഫിലിംഫെയർ അവാർഡുകൾ തുടങ്ങിയ പുരസ്കാരങ്ങൾ നേടിയിട്ടുണ്ട്. കമൽ ഹാസൻ, രാജമൗലി, ജൂനിയർ എൻടിആർ, രവി തേജ ഉൾപ്പെടെ നിരവധി പ്രമുഖർ അദ്ദേഹത്തിന്റെ വിയോ​ഗത്തിൽ അനുശോചനം രേഖപ്പെടുത്തി.