വിജയ് ദേവരക്കൊണ്ട നായകനായി എത്തിയ ചിത്രമായിരുന്നു ലൈഗര്‍. 2022 ല്‍ പുറത്തിറങ്ങിയ ബിഗ് ബജറ്റ് ചിത്രത്തിന്റെ നിര്‍മാണം ധര്‍മ പ്രൊഡക്ഷന്‍സ് ആയിരുന്നു. മൈക്ക് ടൈസണും ചിത്രത്തിലഭിനയിച്ചിരുന്നു. അനന്യ പാണ്ഡെയായിരുന്നു ചിത്രത്തിലെ നായിക. വലിയ പ്രതീക്ഷയോടെ തീയേറ്ററുകളിലെത്തിയ ചിത്രം പക്ഷെ ദയനീയമായി പരാജയപ്പെട്ടു.

ലൈഗറിന് വേണ്ടി വിജയ് ദേവരക്കൊണ്ട നടത്തിയ മേക്കോവര്‍ വലിയ ചര്‍ച്ചയായിരുന്നു. ചിത്രത്തില്‍ ഫൈറ്റര്‍ ആയിട്ടാണ് വിജയ് ദേവരക്കൊണ്ട അഭിനയിച്ചത്. ലൈഗറിന് വേണ്ടി ശരീരത്തെ തയ്യാറാകാന്‍ കടന്നു പോയ വെല്ലുവിളികളെക്കുറിച്ച് സംസാരിക്കുകയാണ് വിജയ് ദേവരക്കൊണ്ട. സുധീര്‍ ശ്രീനിവാസന് നല്‍കിയ അഭിമുഖത്തിലാണ് താരം മനസ് തുറന്നത്.

''എല്ലാ അഭിനേതാക്കളും ഇതുപോലൊരു ഘട്ടത്തിലൂടെ കടന്നു പോയിട്ടുണ്ട്. ഞാന്‍ ഇനിയൊരിക്കലും അത് ആവര്‍ത്തിക്കില്ല. ലൈഗറിന് വേണ്ടി ഞാനത് ചെയ്തിട്ടുണ്ട്. അതിലെ ബോഡിയ്ക്ക് വേണ്ടി വെള്ളം കുടിയ്ക്കുന്നത് കുറച്ചു. തുടക്കത്തില്‍ നാല് മുതല്‍ ആറ് ലിറ്റര്‍ വരെയായിരുന്നു കുടിച്ചിരുന്നത്. അത് കുറച്ച് കുറച്ച് മുന്നൂറും ഇരുന്നൂറും നൂറും എംഎല്ലിലേക്ക് എത്തിച്ചു. ഷൂട്ട് തുടങ്ങുന്നതിന് പത്ത് മണിക്കൂര്‍ മുമ്പ് വെള്ളം കുടിക്കുന്നതേ നിര്‍ത്തി. പിന്നെ ഐസ് ക്യൂബ് നക്കുക മാത്രമാണ് ചെയ്തിരുന്നത്'' താരം പറയുന്നു.

''ബോഡി ബില്‍ഡര്‍മാര്‍ ചെയ്യുന്ന കാര്യമാണ്. അന്ന് ഓരോ സെക്കന്റും ഞാന്‍ ചിന്തിച്ചിരുന്നത് വെള്ളം വെള്ളം എന്ന് മാത്രമാണ്. ഉറക്കത്തില്‍ പോലും വെള്ളം കുടിക്കുന്നതാണ് കണ്ടിരുന്നത്. നാല് മണിക്കൂര്‍ ഷൂട്ടുണ്ടായിരുന്നു. അതിന് ശേഷം വെള്ളം കുടിച്ചോളാന്‍ പറഞ്ഞു. എന്റെ ടീമിനോട് എനിക്ക് തേങ്ങാ വെള്ളം വേണമെന്ന് പറഞ്ഞു. നാല് ലിറ്റര്‍ വേണം. ഭക്ഷണമൊന്നും എനിക്ക് വേണ്ടായിരുന്നു. ഷൂട്ട് തീര്‍ന്നതും ഒറ്റയടിക്ക് കുടിച്ച് തീര്‍ത്തു'' എന്നും വിജയ് ദേവരക്കൊണ്ട പറയുന്നു.