ചുരുങ്ങിയ സമയം കൊണ്ട് മലയാളികളുടെ ശ്രദ്ധ പിടിച്ചു പറ്റിയ നടിയാണ് വിൻസി അലോഷ്യസ്. 30-ാം പിറന്നാൾ ആഘോഷിക്കുന്ന ചിത്രം പങ്കുവച്ചിരിക്കുകയാണ് വിൻസി ഇപ്പോൾ. കുടുംബാംഗങ്ങൾക്കൊപ്പമുള്ള ചിത്രങ്ങൾ പങ്കുവച്ചാണ് താരം സന്തോഷം അറിയിച്ചത്. അച്ഛനമ്മമാർക്കൊപ്പം പിറന്നാൾ കേക്ക് മുറിക്കുന്നതും ചിത്രങ്ങളിൽ കാണാം. വിൻസിക്ക് ലഭിച്ച പിറന്നാൾ സമ്മാനങ്ങളും ശ്രദ്ധേയമായി.

സമ്മാനങ്ങൾ തുറന്നു കാണിച്ച കൂട്ടത്തിൽ, സംസ്ഥാന ചലച്ചിത്ര പുരസ്‌കാരം സ്വീകരിച്ചു നിൽക്കുന്ന വിൻസിയുടെ പല ചിത്രങ്ങൾ ചേർത്തുവച്ച മനോഹരമായ ഒരു ഫോട്ടോ ആൽബവും ഉണ്ടായിരുന്നു. ‘എന്റെ മനോഹരമായ മുപ്പതുകളെ കാത്തിരിക്കുന്നു.’ എന്ന അടിക്കുറിപ്പോടെയാണ് വിൻസി ചിത്രങ്ങൾ പങ്കുവെച്ചത്.

റിയാലിറ്റി ഷോയിൽ നിന്നാണ് വിൻസി സിനിമയിലേക്ക് ചുവടു വയ്ക്കുന്നത്. വികൃതി എന്ന ചിത്രത്തിലൂടെയായിരുന്നു നടിയുടെ സിനിമാ അരങ്ങേറ്റം. ചിത്രത്തിലെ വിൻസിയുടെ കഥാപാത്രം ഏറെ ശ്രദ്ധ നേടുകയും ചെയ്തിരുന്നു. വെറും 13 സിനിമകളിൽ മാത്രം അഭിനയിച്ച വിൻസിക്ക് ഈ ചുരുങ്ങിയ കാലയളവിനുള്ളിൽ മലയാള സിനിമയിലെ പരമോന്നത ബഹുമതികളിലൊന്നായ സംസ്ഥാന ചലച്ചിത്ര പുരസ്‌കാരം നേടാൻ കഴിഞ്ഞു.

'രേഖ' എന്ന ചിത്രത്തിലെ അഭിനയ മികവിനാണ് 2022-ലെ മികച്ച നടിക്കുള്ള സംസ്ഥാന പുരസ്‌കാരം വിൻസി അലോഷ്യസ് കരസ്ഥമാക്കിയത്. സൂത്രവാക്യം ആണ് വിൻസിയുടേതായി ഒടുവിൽ തിയറ്ററുകളിലെത്തിയ ചിത്രം.