സിനിമയിൽ മാത്രമല്ല ജീവിതത്തിലും വക്കീൽ കുപ്പായം അണിയാനാണ് നടനും സംവിധായകനുമായ ബാലചന്ദ്ര മേനോന്റെ ആ​ഗ്രഹം. കേസുകൾ വാദിക്കാനായി കോടതിയിലെത്താനുള്ള തയ്യാറെടുപ്പിലാണ് ഇപ്പോഴദ്ദേഹം. ഇതിനായി ഇന്നലെ നടന്ന ബാർ കൗൺസിൽ ഓഫ് ഇന്ത്യയുടെ ഓൾ ഇന്ത്യ ബാർ എക്സാമിനേഷന് പുതിയ കുട്ടികൾക്കൊപ്പം ബാലചന്ദ്ര മേനോനുമുണ്ടായിരുന്നു. പരീക്ഷയിൽ വിജയിച്ചാൽ  കോടതികളിൽ കേസുകൾ വാദിക്കുന്നതിനുള്ള അനുമതി നേടാനാകും. 

അഭിഭാഷകനാവുകയെന്നത്‌ തന്റെ ഏറെ നാളായുള്ള ആഗ്രഹമായിരുന്നുവെന്നും പല കാരണം കൊണ്ടും എൽഎൽബി പരീക്ഷയെഴുത്ത് നീണ്ടുപോയെന്നും അദ്ദേഹം പറഞ്ഞു. 2011ൽ അദ്ദേഹം  സന്നത്ത് എടുത്തിരുന്നു. ബാർ കൗൺസിൽ ഓഫ് ഇന്ത്യയുടെ അനുമതി ഉണ്ടെങ്കിലെ കോടതികളിൽ വാദിക്കാൻ സാധിക്കൂ എന്നതുകൊണ്ടാണ് പരീക്ഷയ്ക്കെത്തിയത്. 

ആലുവ ചൂണ്ടി ഭാരതമാത സ്‌കൂൾ ഓഫ് ലീഗൽ സ്റ്റഡീസിലാണ് ബാലചന്ദ്ര മേനോൻ പരീക്ഷയ്ക്കെത്തിയത്. രാവിലെ പത്ത് മണി മുതൽ ഉച്ചയ്ക്ക് ഒരു മണി വരെയായിരുന്നു പരീക്ഷ. പുതിയ കുട്ടികൾക്കൊപ്പമിരുന്നുള്ള പരീക്ഷ പുത്തൻ അനുഭവമായിരുന്നുവെന്നും അദ്ദേഹം പറഞ്ഞു.