അബുദാബി: ചില സ്ഥലങ്ങളിൽ വ്യാജ ക്യുആർ കോഡ് സ്റ്റിക്കറുകൾ പ്രചരിക്കുന്നതിനെക്കുറിച്ച് അബുദാബി പൊലീസ് പൊതുജനങ്ങൾക്ക് മുന്നറിയിപ്പ് നൽകി, ബാങ്കിങ് വിവരങ്ങളും വ്യക്തിഗത വിവരങ്ങളും മോഷ്‌ടിക്കാൻ ലക്ഷ്യമിട്ടുള്ള ഡിജിറ്റൽ തട്ടിപ്പ് പദ്ധതികളിൽ അവ ഉപയോഗിച്ചേക്കാമെന്ന് പൊലീസ് മുന്നറിയിപ്പ് നൽകി.

ചില സ്ഥലങ്ങളിലെ പേയ്‌മെ​ന്റ് ഉപകരണങ്ങളിലോ പൊതു സൈനേജുകളിലോ ഔദ്യോഗിക ക്യുആർ കോഡുകളോട് സാമ്യമുള്ള വ്യാജ ക്യുആർ കോഡുകൾ തട്ടിപ്പുകാർ സ്ഥാപിക്കുന്നതായി പൊലീസ് അറിയിച്ചു.

സ്‌കാൻ ചെയ്യുമ്പോൾ, ഈ കോഡുകൾക്ക് അത് ചെയ്യുന്നവരുടെ കാർഡ് വിശദാംശങ്ങളോ വ്യക്തിഗത ഡാറ്റയോ അഭ്യർത്ഥിക്കുന്ന വ്യാജ വെബ്‌സൈറ്റുകളിലേക്ക് റീഡയറക്‌ടു ചെയ്യാനാകും. ഇതുവഴി ലഭിക്കുന്ന വിവരങ്ങൾ ഉപയോഗിച്ച് തട്ടിപ്പുകാർ ഹാക്കിങ്ങും സാമ്പത്തിക തട്ടിപ്പും നടത്തും.

ഔദ്യോഗികമായതോ അംഗീകൃതമായ വഴിയോ സർക്കാർ ചാനലുകൾ വഴിയോ മാത്രമായി പണമിടപാടുകൾ നടത്തണമെന്ന് അബുദാബി പൊലീസ് ആവർത്തിച്ചു.

ഉറവിടം വ്യക്തമല്ലാത്തതോ ഔദ്യോഗിക സൈനേജി​ന്റെ ഭാഗമായി പ്രദർശിപ്പിക്കാത്തതോ ആയ ഏതെങ്കിലും QR കോഡ് സ്‌കാൻ ചെയ്യുകയോ അതിൽ ഇടപാട് നടത്തുകയോ ചെയ്യരുതെന്ന് പൊതുജനങ്ങളോട് അഭ്യർത്ഥിച്ചു.

ഏതെങ്കിലും പേയ്‌മെ​ന്റ് പൂർത്തിയാക്കുന്നതിന് മുമ്പ് ഓപ്പറേറ്റിങ് എ​ന്റിറ്റിയുടെ പേര് പരിശോധിക്കാനും സ്ഥിരീകരിക്കാത്ത ലിങ്കുകളിലൂടെ ബാങ്കിങ് വിശദാംശങ്ങൾ നൽകുന്നത് ഒഴിവാക്കണമെന്നും പൊലീസ് നിർദ്ദേശിച്ചു.

സംശയാസ്പദമായ സ്റ്റിക്കറുകളോ വഞ്ചനാശ്രമങ്ങളോ ശ്രദ്ധയിൽപ്പെട്ടാൽ അവ ഔദ്യോഗിക റിപ്പോർട്ടിങ് ചാനലുകളിലൂടെ ഉടൻ അറിയിക്കണമെന്ന് പൊലീസ് പറഞ്ഞു.

സൈബർ കുറ്റകൃത്യങ്ങളെ ചെറുക്കാനുള്ള തങ്ങളുടെ പ്രതിജ്ഞാബദ്ധത വീണ്ടും ഉറപ്പിച്ചുകൊണ്ട് അബുദാബി പൊലീസ് പൊതുജന ബോധവൽക്കരണ ശ്രമങ്ങൾ തുടരുമെന്നും പൊതുജന സുരക്ഷയും ഡിജിറ്റൽ സുരക്ഷയും സംരക്ഷിക്കുന്നതിനായി ഇത്തരം സംഭവങ്ങൾ റിപ്പോർട്ട് ചെയ്തുകൊണ്ട് സഹകരിക്കണമെന്നും പൊലീസ് അഭ്യർത്ഥിച്ചു.

പണമടയ്ക്കാനായി ക്യു ആർ കോഡുകൾ സ്കാൻ ചെയ്യുമ്പോൾ ജാഗ്രത പാലിക്കണമെന്ന് ദുബൈ റോഡ് ആൻഡ് ട്രാൻസ്‌പോർട്ട് അതോറിറ്റി കഴിഞ്ഞ ദിവസം മുന്നറിയിപ്പ് നൽകിയിരുന്നു.

വാഹനം പാർക്ക് ചെയ്യുന്നതുമായി ബന്ധപ്പെട്ട് പാർക്കിങ് കമ്പനി സ്ഥാപിച്ചിരുന്ന ക്യു ആർ കോഡുകളിൽ കൃത്രിമം കാണിച്ച് തട്ടിപ്പ് നടത്തുന്നതിന്റെ ദൃശ്യങ്ങൾ സോഷ്യൽ മീഡിയയിൽ വലിയ ചർച്ച ആയി മാറിയിരുന്നു.

ഇതോടെയാണ് വാഹനയാത്രക്കാർക്ക് ജാഗ്രത നിർദേശവുമായി ആർ ടി എ രംഗത്ത് എത്തിയത്.