ദുബൈ: ട്രാഫിക് നിയമ ലംഘനങ്ങൾ കണ്ടെത്താൻ പുതിയ മാർഗവുമായി ദുബൈ പൊലീസ്. ഇന്‍റലിജന്‍റ് ട്രാഫിക് സിസ്റ്റം എന്ന് പേരിട്ടിരിക്കുന്ന പുതിയ സംവിധാനത്തിന് മനുഷ്യ ഇടപെടലില്ലാതെ തന്നെ നിയമ ലംഘനങ്ങൾ കണ്ടെത്താൻ കഴിയും. ദുബൈ വേൾഡ് ട്രേഡ് സെന്‍ററിൽ നടക്കുന്ന ‘ജൈടെക്സ്’ മേളയിലാണ് ഈ സിസ്റ്റം പൊലീസ് അവതരിപ്പിച്ചത്.

പ്രധാനമായും അഞ്ച് നിയമലംഘനങ്ങൾ ഈ സംവിധാനം വഴി കണ്ടെത്താൻ സാധിക്കും. ഡ്രൈവിങ്ങിനിടെ മൊബൈൽ ഫോൺ ഉപയോഗിക്കുക,സീറ്റ് ബെൽറ്റ് ധരിക്കാതിരിക്കുക, ഗതാഗതം തടസ്സപ്പെടുത്തുക, റോഡിന് നടുവിൽ വാഹനം നിർത്തുക, വാഹനങ്ങൾക്കിടയിൽ സുരക്ഷിതമായ അകലം പാലിക്കാതിരിക്കുക തുടങ്ങിയ നിയമലംഘനങ്ങളാണ് ഈ സിസ്റ്റം പ്രധാനമായും കണ്ടെത്തുന്നത്.

വിവിധ ഇടങ്ങളിൽ സ്ഥാപിച്ചിരിക്കുന്ന തത്സമയ കാമറ വഴി റോഡിലൂടെ സഞ്ചരിക്കുന്ന എല്ലാ വാഹനങ്ങളും കൃത്യമായി നീരീക്ഷിക്കും.

കാമറയിൽ പതിയുന്ന ആ ദൃശ്യങ്ങൾ ആർട്ടിഫിഷ്യൽ ഇന്റലിജൻസ് സംവിധാനം പരിശോധിക്കും. അതിന് ശേഷം ഓരോ നിയമലംഘനങ്ങളും കണ്ടെത്തി പൊലീസിന് വിവരം നൽകും. ഇന്‍റലിജന്‍റ് ട്രാഫിക് സിസ്റ്റത്തിലൂടെ കൃത്യവും വളരെ വേഗത്തിലും നിയമലംഘനങ്ങൾ കണ്ടെത്താൻ കഴിയുമെന്നതാണ് ഈ സംവിധാനത്തിന്‍റെ പ്രത്യേകത.

ഇത് പൊലീസ് സേനയുടെ പ്രവർത്തനങ്ങൾക്ക് കൂടുതൽ സഹായകരമാകുമെന്ന് ലഫ്. എൻജിനീയർ അഹ്മദ് അൽ ഹമ്മാദി വ്യക്തമാക്കി.