റിയാദ്: ലോകകപ്പില് സൗദി അറേബ്യയും യുറഗ്വായും തമ്മിലുള്ള മത്സരത്തില് പതിവുകള് തെറ്റിച്ച ഫിഫ അധികൃതരുടെ നീക്കത്തില് കൈയടിച്ച് ആരാധകര്. മത്സരത്തിന്റെ കിക്കോഫിന് മുന്നോടിയായി നടന്ന ദേശീയ ഗാനാലാപന ചടങ്ങില് ഇരുരാജ്യങ്ങളുടെയും കൂറ്റന് പതാകകള് തറയില് വയ്ക്കാതെ വൊളന്റിയര്മാര് വായുവില് ഉയര്ത്തിപ്പിടിക്കുകയായിരുന്നു.
സാധാരണ ഗതിയില് ലോകകപ്പ് മത്സരങ്ങളില് ഇരു ടീമുകളുടെയും പതാകകള് മൈതാനത്തെ പുല്ത്തകിടിയില് വിരിച്ചിടുന്നതാണ് പതിവെങ്കിലും സൗദിയുടെ മത്സരത്തില് ഈ പ്രോട്ടോക്കോളില് ഫിഫ മാറ്റം വരുത്തുകയായിരുന്നു. സാധാരണ ഇരു ടീമിലെയും കളിക്കാര് ഇതിന് ഇരുവശത്തുമായി അണിനിരന്ന് ദേശീയഗാനം ആലപിക്കുകയുമാണ് ചെയ്യാറുള്ളത്. എന്നാല് സൗദി അറേബ്യയുടെ പതാക എപ്പോഴും ഉയര്ത്തിത്തന്നെ പിടിക്കാന് ഫിഫയും സൗദി പ്രതിനിധി സംഘവും തമ്മില് നേരത്തെ തന്നെ പ്രത്യേക ധാരണയിലെത്തിയിരുന്നു.
ലോകകപ്പില് പങ്കെടുക്കുന്ന 48 രാജ്യങ്ങളില് നിലത്തു വയ്ക്കാന് പാടില്ലാത്ത കടുത്ത ഔദ്യോഗിക നിയമങ്ങളുള്ള ഏക പതാക സൗദി അറേബ്യയുടേതാണ്. പതാകയില് ഇസ്ലാമിക വിശ്വാസപ്രഖ്യാപനമായ 'ശഹാദത്ത് കലിമ' രേഖപ്പെടുത്തിയിട്ടുള്ളതിനാലാണിത്. സൗദി അറേബ്യയിലെ ഔദ്യോഗിക നിയമപ്രകാരം ദേശീയ പതാക ഒരിക്കലും നിലത്തോ, വെള്ളത്തിലോ, അല്ലെങ്കില് പതാകയ്ക്ക് താഴെയുള്ള മറ്റേതെങ്കിലും പ്രതലത്തിലോ തൊടാന് പാടില്ല. രാജ്യാന്തര കായിക മേളകളിലോ ഔദ്യോഗിക ചടങ്ങുകളിലോ പതാകയുടെ പവിത്രത കുറയ്ക്കുന്ന തരത്തിലുള്ള യാതൊരു നടപടിയും ഉണ്ടാകരുതെന്നും നിര്ദേശമുണ്ട്. കൂടാതെ നിറം മങ്ങിയതോ കേടുപാടുകള് സംഭവിച്ചതോ ആയ പതാകകള് പ്രദര്ശിപ്പിക്കരുതെന്നും, പഴയ പതാകകള് പൂര്ണമായ ആദരവോടെ മാത്രമേ നശിപ്പിച്ചു കളയാവൂ എന്നും നിയമം വ്യക്തമാക്കുന്നു.
ചടങ്ങിനിടെ സൗദി പതാക പുല്ത്തകിടിയില് മുട്ടിക്കാതെ വൊളന്റിയര്മാര് വായുവില് ഉയര്ത്തിപ്പിടിച്ചു തന്നെ പ്രദര്ശിപ്പിച്ചു. ഒപ്പം പരസ്പര ബഹുമാനം നിലനിര്ത്താനും വേണ്ടി എതിര് ടീമായ യുറഗ്വായുടെ പതാകയും നിലത്തു വയ്ക്കാതെ വൊളന്റിയര്മാര് വായുവില് ഉയര്ത്തിപ്പിടിച്ചു. ഫിഫയുടെയും സംഘാടകരുടെയും യുറഗ്വായ് ടീമിന്റെയും നിലപാടില് സമൂഹമാധ്യമങ്ങളില് വലിയ കൈയടിയാണ് ലഭിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates