കുവൈത്ത് സിറ്റി: ഫാമിലി വിസിറ്റ് വിസയിൽ നിർണ്ണായകമായ മാറ്റം വരുത്തി കുവൈത്ത്. സന്ദർശന വിസയുടെ കാലാവധി ഒരു മാസത്തിൽ നിന്ന് മൂന്ന് മാസമായി നീട്ടി. വിസകളുടെ കാലാവധി ആറ് മാസം മുതൽ ഒരു വർഷം വരെ ഫീസ് നൽകി നീട്ടിയെടുക്കാമെന്ന് ഒന്നാം ഉപപ്രധാന മന്ത്രിയും ആഭ്യന്തരമന്ത്രിയുമായ ശൈഖ് ഫഹദ് യൂസഫ് സഊദ് അസ്സബാഹ് വ്യക്തമാക്കി.

ഫാമിലി വിസിറ്റ് വിസയിൽ സർക്കാർ വരുത്തിയ മറ്റൊരു മാറ്റം വിമാന കമ്പനികളുമായി ബന്ധപ്പെട്ടാണ്. ഈ വിസയിൽ രാജ്യത്തേക്ക് പ്രവേശിക്കാൻ കുവൈത്ത് ദേശീയ വിമാനക്കമ്പനികളെ ആശ്രയിക്കണം എന്നായിരുന്നു മുൻ നിയമം. കുവൈത്ത് എയർവേയ്സ്, ജസീറ എയർവേയ്സ് എന്നീ വിമാനങ്ങളിൽ മാത്രമായിരുന്നു ഫാമിലി വിസിറ്റ് വിസയിൽ ഉള്ളവർക്ക് യാത്ര ചെയ്യാൻ കഴിയുമായിരുന്നുള്ളൂ.

എന്നാൽ, ഇനി മുതൽ ഈ നിയമം ബാധകമല്ല. ഏത് വിമാനത്തിലും കുവൈത്തിലേക്ക് ഫാമിലി വിസിറ്റ് വിസ ഉള്ളവർക്ക് യാത്ര ചെയ്യാം. ഈ തീരുമാനം ഇന്ത്യയിൽ നിന്നുള്ളവർക്കും വലിയ ആശ്വാസമാകും.

‘കുവൈത്ത് വിസ’ എന്ന സർക്കാർ പ്ലാറ്റ്‌ഫോമിലെ പ്രശ്‌നങ്ങളേപ്പറ്റി പൗരന്മാരുടെയും പ്രവാസികളുടെയും അഭിപ്രായങ്ങൾ പരിഗണിച്ചു മാറ്റങ്ങൾ വരുത്താൻ നിർദേശങ്ങൾ നൽകിയതായും ഈ മാറ്റങ്ങൾ ചൊവ്വാഴ്ച മുതൽ പ്രാബല്യത്തിൽ വരുമെന്നും കുവൈത്ത് ആഭ്യന്തരമന്ത്രി അറിയിച്ചു.

ജനങ്ങളുടെ അഭിപ്രായങ്ങൾ തുറന്ന മനസോടെയാണ് സ്വീകരിക്കുന്നത്,കാരണം കുവൈത്ത് എല്ലാ വിഭാഗത്തിലും മികച്ചതാക്കണം എന്നാണ് ഞങ്ങളുടെ ആഗ്രഹമെന്നും ശൈഖ് ഫഹദ് യൂസഫ് സഊദ് അസ്സബാഹ് വ്യക്തമാക്കി.