കുവൈത്ത് സിറ്റി: വിസ ഫീസ് നിരക്കിൽ മാറ്റം വരുത്താൻ ഒരുങ്ങി കുവൈത്ത്. വിവിധ വിസകളുടെ ഫീസ് 10 ദിനാർ ആയി ഉയർത്തും. താമസ പെർമിറ്റുകൾ സന്ദർശക വിസകൾ എന്നിവയുടെ അപേക്ഷ നടപടിക്രമങ്ങളിലും മാറ്റം വരുത്തുമെന്ന് അറബ് ടൈംസ് റിപ്പോർട്ട് ചെയ്യുന്നു.

ഫാമിലി, ചികിത്സ, മൾട്ടിപ്പിൾ എൻട്രി, ടൂറിസം തുടങ്ങിയ വിസകളുടെ ഫീസ് പത്ത് ദിനാർ ആയി ഉയർത്താനാണ് സർക്കാർ നീക്കം. നിലവിൽ മൂന്ന് ദിനാർ മാത്രമാണ് വിസയുടെ ഫീസ്. വിസ നിയമങ്ങളിൽ കുവൈത്ത് മാറ്റം വരുത്തിയതോടെ കൂടുതൽ ആളുകളാണ് അപേക്ഷകൾ സമർപ്പിക്കുന്നത്. ഇതിന്റെ അടിസ്ഥാനത്തിലാണ് നിരക്കുകൾ വർധിപ്പിച്ചതെന്നാണ് വിവരം.

 ഗാർഹിക തൊഴിലാളികൾ, സർക്കാർ - സ്വകാര്യ മേഖലയിൽ തൊഴിലെടുക്കുന്നവർ, എണ്ണമേഖലയിൽ താൽക്കാലിക തൊഴിലാളികൾ എന്നിവരുടെ വിസ ഫീസ് 10 ദിനാറായി വർദ്ധിപ്പിക്കും. വിവിധ വിസകളിൽ രാജ്യത്തെത്തിയ ശേഷം റസിഡൻസി പെർമിറ്റ് ലഭിക്കാനുള്ള അപേക്ഷകളുടെ നിരക്കിലും മാറ്റം വരുത്തും. പുതുക്കിയ നിരക്കുകൾ അടുത്ത മാസം മുതൽ നിലവിൽ വരും എന്നാണ് റിപ്പോർട്ടുകൾ.