ദുബൈ: ഇലക്ട്രോണിക് ഇൻവോയ്‌സിംഗ് സംവിധാനം നടപ്പിലാക്കുന്നതിൽ വീഴ്ച വരുത്തുന്ന കമ്പനികൾക്കെതിരെ കർശന നടപടി സ്വീകരിക്കുമെന്ന് യു എ ഇ. നിയമം ലംഘിക്കുന്നവർക്കെതിരെ 100 ദിർഹം മുതൽ 5,000 ദിർഹം വരെയുള്ള പിഴ ചുമത്തും. ഇത് സംബന്ധിച്ച ഉത്തരവ് ധനകാര്യ മന്ത്രാലയം പുറത്തിറക്കി.

ഇ- ഇൻവോയ്‌സിംഗ് സംവിധാനം നടപ്പിലാക്കുന്നതിൽ കമ്പനി പരാജയപ്പെടുക, സമയപരിധിക്കുള്ളിൽ ഒരു അംഗീകൃത സേവന ദാതാവിനെ നിയമിക്കാതിരിക്കുക, സമയപരിധിക്കുള്ളിൽ ഇ-ഇൻവോയ്‌സിംഗ് സംവിധാനം വഴി സ്വീകർത്താവിന് ബിൽ കൈമാറാതെയിരിക്കുക തുടങ്ങിയ കുറ്റങ്ങൾക്ക് 5,000 ദിർഹം പിഴ ഈടാക്കും.

പുതിയ സംവിധാനം നടപ്പിലാക്കാൻ കഴിഞ്ഞില്ലെങ്കിൽ ആ വിവരം അധികാരികളെ അറിയിക്കണം. അല്ലെങ്കിൽ വൈകുന്ന ഓരോ ദിവസവും 1000 ദിർഹം പിഴ ഈടാക്കുമെന്നും അധികൃതർ അറിയിച്ചു.

നികുതിയുമായി ബന്ധപ്പെട്ട നടപടിക്രമങ്ങളിലെ കൃത്യതയും, സുതാര്യതയും ഉറപ്പ് വരുത്തുന്നതിന്റെ ഭാഗമായാണ് ഇലക്ട്രോണിക് ഇൻവോയ്‌സിംഗ് സംവിധാനം സർക്കാർ നടപ്പിലാകുന്നത്.

ഈ വർഷം പകുതിയോടെയാണ് ഇ- ഇൻവോയ്‌സിംഗ് നിയന്ത്രണങ്ങൾ യു എ ഇ കൊണ്ട് വന്നത്. 2026 ജൂലൈ മാസത്തിൽ പുതിയ സംവിധാനത്തിന്റെ ആദ്യ ഘട്ടം നടപ്പിലാക്കാനാണ് നീക്കം. അതിനു മുൻപ് എല്ലാവരും നടപടികൾ പൂർത്തിയാക്കി പുതിയ സംവിധാനത്തിലേക്ക് മാറണമെന്നും അധികൃതർ നിർദേശം നൽകി.