ദുബൈ: ഐ ഫോൺ 17 ആദ്യം സ്വന്തമാക്കാനുള്ള മത്സരമാണ് ഇപ്പോൾ യു എ ഇയിൽ നടക്കുന്നത്. അടുത്ത മാസം ആദ്യ ആഴ്ച തന്നെ ഫോൺ മാർക്കറ്റിൽ ഇറങ്ങുമെന്നാണ് റിപ്പോർട്ടുകൾ. ഫോൺ ഇറങ്ങുമ്പോൾ തന്നെ സ്വന്തമാക്കാൻ മുൻകൂട്ടി പണം നൽകിയും ആളുകൾ ബുക്കിങ് തുടങ്ങിയിട്ടുണ്ട്.

500 ദിർഹം നൽകിയാൽ ബുക്കിങ് ലഭിക്കും. ദെയ്റ, ഷാർജ എന്നിവിടങ്ങളിലെ ഷോപ്പുകളിൽ ആണ് കൂടുതൽ ഉപഭോക്താക്കളും ഐ ഫോൺ 17-നായി ബുക്കിങ് നടത്തിയിരിക്കുന്നത്. യു എ ഇ സ്വദേശികൾ മാത്രമല്ല ഇന്ത്യക്കാരും മുൻകൂട്ടി പണം നൽകി ഫോൺ ബുക്ക് ചെയ്യുന്നുണ്ടെന്ന് കടയുടമകൾ പറയുന്നു. വിപണിയിൽ ഫോൺ ഇറങ്ങുമ്പോൾ തന്നെ അത് സ്വന്തമാക്കാനും സോഷ്യൽ മീഡിയയിൽ ആ വിവരം പങ്ക് വെയ്ക്കാനുമാണ് ആളുകൾ മുൻകൂട്ടി ഫോണുകൾ ബുക്ക് ചെയ്യുന്നത്.

ഐ ഫോൺ 17 ന് എന്തൊക്കെ സവിശേഷതകളാണ് ഉള്ളതെന്ന് അറിയാനുള്ള ആകാംഷയും പലർക്കുമുണ്ട്. പുതിയ മോഡലിന്റെ രൂപം, ക്യാമറയിലെ മാറ്റങ്ങൾ, ബോഡി, സ്റ്റെയിൽ എങ്ങനെ ആയിരിക്കുമെന്നുള്ള ചോദ്യങ്ങളും ഷോപ് ഉടമകൾ നേരിടേണ്ടി വരുന്നുണ്ട്. എന്നാൽ ഇക്കാര്യത്തിൽ വ്യക്തമായ ഒരു മറുപടി പറയാൻ അവർക്കും കഴിഞ്ഞിട്ടില്ല. അടുത്ത മാസം 9 തീയതി ഫോൺ മാർക്കറ്റിൽ ഇറങ്ങുമെന്നാണ് റിപ്പോർട്ടുകൾ.