ദുബൈ: യുഎഇയിലെ 19 ബാങ്കുകളുമായും ധനകാര്യ സ്ഥാപനങ്ങളുമായും സഹകരിച്ച്, ഡിഫോൾട്ടഡ് ഡെബ്റ്റ്സ് സെറ്റിൽമെന്റ് ഫണ്ട് 1,435 എമിറാത്തി പൗരരുടെ 47.5 കോടി ദിർഹത്തിലധികം (11 556 222 940 ഇന്ത്യൻരൂപ) വരുന്ന കടങ്ങൾ എഴുതിത്തള്ളി.

കഴിഞ്ഞ വർഷം നവംബറിൽ ഇതുപോലെ യുഎഇ ഭരണാധികാരിയുടെ നിർദ്ദേശപ്രകാരം ഇളവ് നൽകിയതിനേക്കാൾ കൂടിയ തുകയാണ് ഇത്തവണ ഇളവ് ചെയ്തിരിക്കുന്നത്. കഴിഞ്ഞവർഷം 40.1 കോടി ദിർഹത്തിലേറെയാണ് ഇളവ് നൽകിയത്. അന്ന് 1,277 യുഎഇ പൗരർക്ക് ഇതുവഴി നേട്ടം ലഭിച്ചിരുന്നു.

പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നിർദ്ദേശപ്രകാരമാണ് ഈ തീരുമാനം, വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോടതി ചെയർമാനുമായ ഷെയ്ഖ് മൻസൂർ ബിൻ സായിദ് അൽ നഹ്യാന്റെ മേൽനോട്ടത്തിലുള്ള നടപടികളുടെ ഭാഗമാണിത്.

പൗരരുടെ സാമ്പത്തിക ബാധ്യതകൾ ലഘൂകരിക്കുന്നതിനും അവരുടെ ക്ഷേമം ഉറപ്പാക്കുന്നതിനും, കുടുംബ സ്ഥിരതയെ പിന്തുണയ്ക്കുന്നതിനും, വിശാലമായ സാമൂഹിക വികസനത്തിന് സംഭാവന നൽകുന്നതിനുമുള്ള യു എ ഇ ഭരണ നേതൃത്വത്തിന്റെ പ്രതിജ്ഞാബദ്ധതയുടെ ഭാഗമായാണ് ഈ കടമെഴുതി തള്ളൽ സംരഭം.

സാമ്പത്തിക വീഴ്ച വരുത്തിയവരുടെ ജീവിത സമ്മർദ്ദം കുറയ്ക്കുകയും സാമ്പത്തിക സ്ഥിരത വീണ്ടെടുക്കാൻ അവരെ സഹായിക്കുകയും ചെയ്യുക എന്നതാണ് ഈ തീരുമാനത്തിന് പിന്നിലെ ലക്ഷ്യം.

മാനുഷികവും ആരോഗ്യപരവുമായ കാര്യങ്ങൾ, വായ്പയെടുത്ത താഴ്ന്ന വരുമാനക്കാർ , മരണമടഞ്ഞവർ, താഴ്ന്ന വരുമാനമുള്ള വിരമിച്ചവർ, മുതിർന്ന പൗരർ എന്നിവർക്കാണ് ഈ ഇളവുകൾ ലഭിക്കുന്നത്.

ബാങ്കുകളുമായുള്ള കടബാധ്യതകൾ തീർപ്പാക്കൽ നടപടികൾ ഓരോ വായ്പയുടെയും സ്വഭാവവും ഉദ്ദേശ്യവുമായി ബന്ധപ്പെട്ട കർശനമായ നിയമപരവും നിയന്ത്രണത്തിലധിഷ്ഠിതവുമായ മാനദണ്ഡങ്ങൾക്കനുസൃതമായാണ് നടത്തുന്നത്, അത്യാവശ്യവും അവശ്യവുമായ ചെലവുകൾക്ക് ഇത് മുൻഗണന നൽകുന്നു.

അബുദാബി കൊമേഴ്‌സ്യൽ ബാങ്ക് ഗ്രൂപ്പ്, എമിറേറ്റ്‌സ് എൻ‌ബി‌ഡി, ഫസ്റ്റ് അബുദാബി ബാങ്ക്, അബുദാബി ഇസ്ലാമിക് ബാങ്ക്, മഷ്‌റെഖ് ബാങ്ക്, റാക്ബാങ്ക്, ഷാർജ ഇസ്ലാമിക് ബാങ്ക്, ദുബൈ ഇസ്ലാമിക് ബാങ്ക്, ഇ ആൻഡ് യുണൈറ്റഡ് അറബ് ബാങ്ക്, അറബ് ബാങ്ക് ഫോർ ഇൻവെസ്റ്റ്‌മെന്റ് ആൻഡ് ഫോറിൻ ട്രേഡ് (അൽ മസ്രഫ്), കൊമേഴ്‌സ്യൽ ബാങ്ക് ഓഫ് ദുബൈ, എച്ച്‌എസ്‌ബി‌സി, അജ്മാൻ ബാങ്ക്, അംലക് ഫിനാൻസ്, എമിറേറ്റ്‌സ് ഇസ്ലാമിക് ബാങ്ക്, സ്റ്റാൻഡേർഡ് ചാർട്ടേഡ് ബാങ്ക്, നാഷണൽ ബാങ്ക് ഓഫ് ഉമ്മുൽ ഖൈവൈൻ, സിറ്റിബാങ്ക് എന്നിങ്ങനെ 19 ബാങ്കുകളും ധനകാര്യസ്ഥാപനങ്ങളും ഈ സംരംഭത്തിൽ പങ്കാളികളാണ്.