ന്യൂഡല്‍ഹി: അയോധ്യ കേസ് പരിഗണിക്കുന്നത് സുപ്രീം കോടതി മാറ്റി. ഈ മാസം 29 മുതല്‍ കേസില്‍ വാദം കേള്‍ക്കുമെന്ന തീരുമാനമാണ് പരമോന്നത നീതിപീഠം മാറ്റിയത്. സുപ്രീം കോടതി രജിസ്ട്രാര്‍ സര്‍ക്കുലറിലൂടെയാണ് ഇക്കാര്യം വ്യക്തമാക്കിയത്.
കേസില്‍ വാദം കേള്‍ക്കുന്ന ഭരണഘടനാ ബഞ്ചിലെ അംഗമായ ജസ്റ്റിസ് എസ്എ ബോബ്‌ഡെ അവധിയില്‍ പ്രവേശിച്ചതിനെ തുടര്‍ന്നാണ് കേസ് പരിഗണിക്കുന്നത് വീണ്ടും മാറ്റിയത്. പുതിയ തീയതി സുപ്രീം കോടതിയുടെ വെബ്‌സൈറ്റില്‍ പ്രസിദ്ധീകരിക്കുമെന്നും സര്‍ക്കുലറില്‍ പറയുന്നു.
നേരത്തെ രൂപീകരിച്ചിരുന്ന ബഞ്ചില്‍ നിന്ന് ജസ്റ്റിസ് യുയു ലളിത് പിന്‍മാറിയതിനെ തുടര്‍ന്ന് ഈയടുത്ത ദിവസം കേസ് പരിഗണിക്കുന്ന ഭരണഘടനാ ബഞ്ച് പുനഃസംഘടിപ്പിച്ചിരുന്നു. നേരത്തെ മുസ്ലിം സംഘടനകളുടെ അഭിഭാഷകന്റെ എതിര്‍പ്പിനെ തുടര്‍ന്നാണ് ഭരണഘടനാ ബഞ്ചില്‍ നിന്ന് യുയു ലളിത് പിന്‍മാറിയത്.
ജസ്റ്റിസുമാരായ അശോക് ഭൂഷണ്‍, അബ്ദുല്‍ നസീര്‍ എന്നിവരാണ് പുതിയ ബഞ്ചിലേക്ക് എത്തിയത്. ചീഫ് ജസ്റ്റിസ് രഞ്ജന്‍ ഗൊഗോയ് അധ്യക്ഷനായ പുതിയ ബഞ്ചില്‍ ജസ്റ്റിസുമാരായ എസ്എ ബോബ്‌ഡെ, ഡിവൈ ചന്ദ്രചൂഡ്, അശോക് ഭൂഷണ്‍, എസ്എ നസീര്‍ എന്നിവരാണുള്ളത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates