ന്യൂഡല്ഹി: ഡല്ഹി ചലോ മാര്ച്ച് പ്രഖ്യാപിച്ച കര്ഷകരെ അനുനയിപ്പിക്കാന് കേന്ദ്രസര്ക്കാരിന്റെ ഊര്ജ്ജിത ശ്രമം. കേന്ദ്രമന്ത്രിമാര് പങ്കെടുക്കുന്ന കര്ഷക സംഘടനാ നേതാക്കളുടെ യോഗം ഇന്നു വൈകീട്ട് ചണ്ഡീഗഡില് നടക്കും. നാളെയാണ് ഡല്ഹിയിലേക്ക് കര്ഷകര് മാര്ച്ച് പ്രഖ്യാപിച്ചിട്ടുള്ളത്.
കേന്ദ്ര കൃഷിമന്ത്രി അര്ജുന് മുണ്ട, ഭക്ഷ്യമന്ത്രി പിയൂഷ് ഗോയല്, ആഭ്യന്തര സഹമന്ത്രി നിത്യാനന്ദ റായ് എന്നിവരാണ് ചര്ച്ചയില് പങ്കെടുക്കുക. സംയുക്ത കിസാന് മോര്ച്ച, കിസാന് മസ്ദൂര് മോര്ച്ച തുടങ്ങിയ സംഘടനാ നേതാക്കള്ക്കാണ് ചര്ച്ചയിലേക്ക് ക്ഷണിച്ച് കേന്ദ്രസര്ക്കാര് കത്തു നല്കിയത്.
വിളകള്ക്ക് മിനിമം താങ്ങുവില ഉറപ്പാക്കുക തുടങ്ങിയ ആവശ്യങ്ങള് ഉന്നയിച്ചാണ് കര്ഷകര് സമരത്തിനിറങ്ങുന്നത്. ചര്ച്ച പരാജയപ്പെട്ടാല്, കര്ഷക പ്രതിഷേധം നേരിടാന് പഞ്ചാബ്, ഹരിയാന, ഡല്ഹി സര്ക്കാരുകള് മുന്നൊരുക്കം തുടങ്ങി. അതിര്ത്തികളില് കൂടുതല് പൊലീസിനെയും അര്ധ സൈനികരെയും വിന്യസിച്ചു.
മാര്ച്ചിനായി കര്ഷകര് ഡല്ഹിയിലേക്ക് ഇന്ന് എത്തിച്ചേരുമെന്നതു കണക്കിലെടുത്ത് തലസ്ഥാനത്ത് സുരക്ഷ ശക്തമാക്കിയിട്ടുണ്ട്. ഡല്ഹിയിലേക്കുള്ള അതിര്ത്തികള് അടച്ചു. ഹരിയാന, പഞ്ചാബ് എന്നിവിടങ്ങളില് നിന്നുള്ള അതിര്ത്തികളില് കൂടുതല് സുരക്ഷാ ഉദ്യോഗസ്ഥരെ വിന്യസിച്ചു. റോഡുകളില് കോണ്ക്രീറ്റ് ബാരിക്കേഡുകള് നിരത്തി.
കര്ഷകമാര്ച്ച് കണക്കിലെടുത്ത് പഞ്ച്കുളയില് നിരോധനാജ്ഞ പ്രഖ്യാപിച്ചിട്ടുണ്ട്. ഹരിയാനയിലെ ഏഴു ജില്ലകളില് ഇന്റര്നെറ്റ് നിരോധനവും ഹരിയാന സര്ക്കാര് ഏര്പ്പെടുത്തിയിട്ടുണ്ട്. കൂട്ടമായി എസ്എംഎസ് അയക്കുന്നതിനും, ഡോങ്കിള് പ്രവര്ത്തിപ്പിക്കുന്നതിനും നിയന്ത്രണമുണ്ട്. സംയുക്ത കിസാന് മോര്ച്ചയും കിസാന് മസ്ദൂര് മോര്ച്ചയും പ്രഖ്യാപിച്ച ഡല്ഹി ചലോ മാര്ച്ചില് ഇരുന്നൂറിലേറെ സംഘടനകള് പങ്കെടുക്കുമെന്നാണ് റിപ്പോര്ട്ടുകള്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates