കാണ്‍പുര്‍: രണ്ടു കിലോ ഭാരം വരുന്ന സ്വര്‍ണാഭരണങ്ങള്‍ പതിവായി അണിഞ്ഞ് ഗോള്‍ഡന്‍ ബാബ എന്നറിയപ്പെട്ട മനോജ് സെന്‍ഗാറിനെ കാണാതായതായി പരാതി. വീട്ടുകാരുടെ പരാതിയില്‍ അന്വേഷണം തുടങ്ങിയതായി പൊലീസ് അറിയിച്ചു.

സ്വര്‍ണാഭരണങ്ങളോടുള്ള ഭ്രമം മൂലമാണ് സെന്‍ഗാറിന് ഗോള്‍ഡന്‍ ബാബ എന്ന പേരുവീണത്. കഴിഞ്ഞ വര്‍ഷം അഞ്ചു ലക്ഷം രൂപ വില വരുന്ന സ്വര്‍ണ മാസ്‌ക് ധരിച്ച് സെന്‍ഗാര്‍ വാര്‍ത്തകളില്‍ ഇടംപിടിച്ചിരുന്നു. അതിനും മുമ്പായി ലക്ഷങ്ങള്‍ വിലവരുന്ന ആഭരണങ്ങള്‍ അണിഞ്ഞ് കോടതിയില്‍ ഹാജരായതോടെയാണ് ഇയാള്‍ പ്രശസ്തനായത്. കാണ്‍പുരിലെ ബപ്പി ലഹിരിയെന്നും സെന്‍ഗാറിനു പേരുണ്ട്.

ചൊവ്വാഴ്ച രാവിലെ വീട്ടില്‍നിന്നു പോയ സെന്‍ഗാര്‍ തിരിച്ചുവന്നിട്ടില്ലെന്നാണ് കുടുംബാംഗങ്ങള്‍ പറയുന്നത്. പ്രദേശത്തെ സിസിടിവി ദൃശ്യങ്ങള്‍ പരിശോധിച്ചുവരികയാണെന്നും ആശങ്കപ്പെടേണ്ട ഒന്നുമില്ലെന്നുമാണ് പൊലീസിന്റെ പക്ഷം. പുറത്തുപോവുമ്പോള്‍ ബാബ ആഭരണങ്ങള്‍ ഒന്നും അണിഞ്ഞിരുന്നില്ലെന്നും അതിനാല്‍ മോഷണമോ കവര്‍ച്ചയോ പോലുള്ള ഒന്നും സംശയിക്കേണ്ടതില്ലെന്നും പൊലീസ് പറയുന്നു.