ഭോപ്പാല്‍: മധ്യപ്രദേശില്‍ 17കാരനെ 16കാരനും കൂട്ടുകാരും ചേര്‍ന്ന് അടിച്ചുകൊന്നു. സഹോദരിയുടെ ചിത്രം ഫെയ്‌സ്ബുക്കില്‍ പങ്കുവെച്ചതിനെ ചൊല്ലിയുള്ള തര്‍ക്കമാണ് കൊലപാതകത്തില്‍ കലാശിച്ചത്. 

ജബല്‍പൂര്‍ ജില്ലയിലാണ് സംഭവം. കൃഷ്ണയാണ് കൊല്ലപ്പെട്ടത്. കൃഷ്ണയുടെ സഹോദരിയുടെ ചിത്രം 16കാരന്‍ ഫെയ്‌സ്ബുക്കില്‍ പങ്കുവെച്ചു. ഇതില്‍ പ്രകോപിതനായ കൃഷ്ണ ദിവസങ്ങള്‍ക്ക് മുന്‍പ് 16കാരനുമായി വഴക്കിടുകയും അടിപിടി കൂടുകയും ചെയ്തിരുന്നു. പ്രശ്‌നം പരിഹരിക്കാന്‍ റെയില്‍വേ പാളത്തിന് സമീപം വരാന്‍ കൃഷ്ണയോട് 16കാരന്‍ ആവശ്യപ്പെട്ടു. ഇതനുസരിച്ച് വന്ന കൃഷ്ണയെ 16കാരന്‍ സംഘം ചേര്‍ന്ന് ആക്രമിക്കുകയായിരുന്നുവെന്ന് പൊലീസ് പറയുന്നു.

കൃഷ്ണ ബന്ധുവിനൊപ്പമാണ് മുന്‍ നിശ്ചയിച്ച പ്രകാരം റെയില്‍വേ പാളത്തിന് സമീപം എത്തിയത്. 16കാരന്‍ മൂന്ന് കൂട്ടുകാരോടൊപ്പമാണ് സ്ഥലത്ത് എത്തിയത്. ചിത്രം സോഷ്യല്‍മീഡിയയില്‍ പങ്കുവെച്ചതിനെ ചൊല്ലി വീണ്ടും ഇരുവരും തമ്മില്‍ വാക്കേറ്റമായി. പ്രതികളില്‍ ഒരാള്‍ ഇരുമ്പു വള കൊണ്ട് കൃഷ്ണയെ മര്‍ദ്ദിച്ചു. തുടര്‍ന്ന് നാലുപേര്‍ ചേര്‍ന്ന് മര്‍ദ്ദിക്കുകയും മൂര്‍ച്ചയേറിയ ആയുധം ഉപയോഗിച്ച് കൃഷ്ണയുടെ കാലില്‍ കുത്തി പരിക്കേല്‍പ്പിക്കുകയും ചെയ്തതായി പൊലീസ് പറയുന്നു. 

റോഡില്‍ തലകറങ്ങിവീണ കൃഷ്ണയെ വഴിയാത്രക്കാരുടെ സഹായത്തോടെ ബന്ധു ആശുപത്രിയില്‍ എത്തിച്ചു. അതിനിടെ പ്രതികള്‍ പ്രദേശത്ത് നിന്ന് ഓടിമറഞ്ഞിരുന്നു. ആശുപത്രിയില്‍ ചികിത്സയ്ക്കിടെ ശനിയാഴ്ച രാത്രി തന്നെ കൃഷ്ണ മരിച്ചതായി പൊലീസ് പറയുന്നു. കൃഷ്ണയുടെ അച്ഛന്റെ പരാതിയില്‍ നാലുപേര്‍ക്കെതിരെ പൊലീസ് കേസെടുക്കുകയും രണ്ടുപേരെ കസ്റ്റഡിയിലെടുക്കുകയും ചെയ്തിട്ടുണ്ട്.