ജയ്പൂര്‍: പശുക്കളുടെ ചര്‍മ്മ രോഗങ്ങളെ കുറിച്ചുള്ള ചര്‍ച്ചയ്ക്കായി എംഎല്‍എ നിയമസഭയില്‍ എത്തിയത് പശുവുമായി. രാജസ്ഥാനിലെ പുഷ്‌കര്‍ നിയമസഭാ മണ്ഡലത്തിലെ ബിജെപി എംഎല്‍എ സുരേഷ് സിങ്ങ് റാവത്താണ് പശുവുമായി നിയമസഭാ വളപ്പിലെത്തിയത്. ചര്‍മ്മരോഗത്തെ തുടര്‍ന്ന് നിരവധി പശുക്കള്‍ ചത്തിട്ടും സര്‍ക്കാരിന്റെ ശ്രദ്ധയുണ്ടാകാത്തതിനെ തുടര്‍ന്നായിരുന്നു എംഎല്‍എയുടെ നടപടി.

പശുവുമായി എത്തിയ എംഎല്‍എ മാധ്യമപ്രവര്‍ത്തകരെ കാണുന്നതിനിടെ കയര്‍ പൊട്ടിച്ച് പശു ഓടുകയായിരുന്നു. എംഎല്‍എയ്ക്ക് ഒപ്പമുണ്ടായിരുന്ന ആളുകള്‍ പശുവിനെ പിടിക്കാന്‍ നെട്ടോട്ടമോടിയെങ്കിലും ഫലമുണ്ടായില്ല.

പശു കയര്‍ പൊട്ടിച്ച് ഓടിയതിന് കാരണം കോണ്‍ഗ്രസ് ആണെന്ന് എംഎല്‍എ ആരോപിച്ചു. ഗോ മാതാവിന് പോലും സര്‍ക്കാരിനോട് ദേഷ്യമാണ്. രോഗം ബാധിച്ച പശുക്കളുടെ സംരക്ഷണത്തിന് മരുന്നുകളും വാക്‌സിനുകളും ഏര്‍പ്പെടുത്തണമെന്ന് എംഎല്‍എ പറഞ്ഞു. പശുക്കളുടെ ക്ഷേമത്തിനായി സര്‍ക്കാര്‍ ഒന്നും ചെയ്യാത്ത സാഹചര്യത്തിലാണ് പശുവിനെയുമായി നിയമസഭയിലേക്ക് എത്തിയതെന്നും ക്ഷക്കണക്കിന് പശുക്കളെ കൊന്നൊടുക്കിയവരാണ് കോണ്‍ഗ്രസെന്നും എംഎല്‍എ ആരോപിച്ചു.

ചര്‍മ്മരോഗത്തെ തുടര്‍ന്ന് പശുക്കള്‍ മരിക്കുന്ന സാഹചര്യത്തില്‍ കേന്ദ്രസര്‍ക്കാര്‍ ഇത് ദേശീയ ദുരന്തമായി പ്രഖ്യാപിക്കണമെന്ന് മുഖ്യമന്ത്രി അശോക് ഗേലോട്ട് പറഞ്ഞു. രോഗത്തില്‍ നിന്ന് പശുക്കളെ രക്ഷിക്കുന്നതിനാണ് സര്‍ക്കാര്‍ മുന്‍ഗണന നല്‍കുന്നത്. പ്രതിരോധ കുത്തിവയ്പുകളും മരുന്നുകളും കേന്ദ്രം നല്‍കണമെന്നും മുഖ്യമന്ത്രി പറഞ്ഞു.

ഈ വാര്‍ത്ത കൂടി വായിക്കൂ 

പ്രതിശ്രുത വധുവിന്റെയും അമ്മയുടെയും സ്വകാര്യ വീഡിയോ പകര്‍ത്തി, സാമൂഹ്യ മാധ്യമത്തില്‍ പ്രചരിപ്പിച്ചു;  യുവതി ഡോക്ടറെ അടിച്ചുകൊന്നു

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ