ന്യൂഡല്‍ഹി: ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുടെ അവധിക്കാല ചിത്രത്തെച്ചൊല്ലി ബിജെപി ഉയര്‍ത്തിയ വിവാദത്തിന് മറുപടിയുമായി കോണ്‍ഗ്രസ്. ചിത്രത്തില്‍ രാഹുലിനൊപ്പമുള്ളത് അദ്ദേഹത്തിന്റെ സുഹൃത്തിന്റെ ഭാര്യയും കുട്ടിയുമാണെന്നും സ്ത്രീകളോടുള്ള ബിജെപിയുടെ സങ്കുചിത മനോഭാവമാണ് ഗിരിരാജ് സിങ്ങിന്റെ പോസ്റ്റിലൂടെ വ്യക്തമാകുന്നതെന്നും കോണ്‍ഗ്രസ് വക്താവ് സുപ്രിയ ശ്രീനാതെ എക്‌സില്‍ കുറിച്ചു.

കേന്ദ്രമന്ത്രി ഗിരിരാജ് സിങ്ങ് എക്‌സിലൂടെയാണ് രാഹുല്‍ ഗാന്ധിയുടെ അവധിക്കാല ചിത്രം പങ്കുവെച്ചത്. നീലക്കടലിന്റെ പശ്ചാത്തലത്തില്‍ ഒരു ബോട്ടിലിരിക്കുന്ന രാഹുല്‍ ഗാന്ധിയെയും, ഒപ്പം കറുത്ത ശിരോവസ്ത്രവും സണ്‍ഗ്ലാസും ധരിച്ച സ്ത്രീയുമാണ് ചിത്രത്തിലുള്ളത്. ഇവരുടെ ഇടയില്‍ ഒരു കുട്ടിയുമുണ്ട്. 'രാഹുല്‍ ജീ, ഈ ചിത്രം എവിടെയാണ് എടുത്തത്, എപ്പോഴാണ് എടുത്തത്, ഒപ്പമുള്ള ആളുകള്‍ ആരാണ്? എനിക്ക് അറിയാന്‍ കൗതുകമുണ്ട്!' എന്ന കുറിപ്പോടെയാണ് ഗിരിരാജ് സിങ് ചിത്രം പങ്കുവെച്ചത്.

കേന്ദ്രമന്ത്രിയുടെ ചോദ്യത്തിന് രൂക്ഷ ഭാഷയിലാണ് കോണ്‍ഗ്രസ് വക്താവ് സുപ്രിയ ശ്രീനാതെ മറുപടി നല്‍കിയത്. 'ഒരു സ്ത്രീയെയും പുരുഷനെയും ഒരുമിച്ച് കാണുമ്പോള്‍ നീചമായ ചിന്തകള്‍ മാത്രമേ നിങ്ങള്‍ക്ക് വരൂ. ചിത്രത്തിലെ സ്ത്രീയും കുട്ടിയും രാഹുല്‍ ജിയുടെ സുഹൃത്തിന്റെ ഭാര്യയും കുട്ടിയുമാണ് - അവര്‍ ഒരുമിച്ച് ഒരു അവധിക്കാലം ആഘോഷിക്കുകയായിരുന്നു. സുഹൃത്ത് ഫോട്ടോയിലില്ല. നിങ്ങളെപ്പോലുള്ള വൃത്തികെട്ട ഇഴജന്തുക്കളുടെ ഇടയില്‍ സ്ത്രീകള്‍ സുരക്ഷിതരല്ല' -അവര്‍ കുറിച്ചു.

യുഎസിലെ ടെക്‌സാസിലുള്ള ലേക്ക് റേ റോബര്‍ട്ട്‌സില്‍ വെച്ചാണ് ഈ ചിത്രം എടുത്തതെന്ന് ഇന്ത്യന്‍ ഓവര്‍സീസ് കോണ്‍ഗ്രസ് സോഷ്യല്‍ മീഡിയ ചുമതലയുള്ള ആവിദ് ദണ്ടിയ വ്യക്തമാക്കി. 'പ്രായമാകുമ്പോള്‍ കൗതുകം അത്ര നല്ലതല്ല... നല്ല വല്ല ഡോക്ടറെയും കാണുന്നത് നന്ന്' -യൂത്ത് കോണ്‍ഗ്രസ് മുന്‍ അധ്യക്ഷന്‍ ബിവി ശ്രീനിവാസ് ഗിരിരാജ് സിങ്ങിനെ പരിഹസിച്ചു.