ന്യൂഡല്‍ഹി: എസ്ഐആറിനും ഗ്യാനേഷ് കുമാറിനുമെതിരെ നവംബര്‍ ഒന്നിന് ഇന്ത്യ മുന്നണി രാംലീല മൈതാനത്ത് നടത്താൻ നിശ്ചയിച്ചിട്ടുള്ള റാലി മാറ്റി വെക്കണമെന്ന വ്യാപാരികളുടെ ആവശ്യത്തിന് രാഹുല്‍ ഗാന്ധിയുടെ മറുപടി. വോട്ട് മോഷ്ടിക്കപ്പെട്ടു എന്നാരോപിച്ച് നടത്തുന്ന പ്രതിഷേധങ്ങള്‍ അവസാനിക്കണമെങ്കില്‍ മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ പുറത്താക്കാന്‍ നരേന്ദ്രമോദിയോട് ആവശ്യപ്പെടാന്‍ രാഹുല്‍ ഗാന്ധി ഡല്‍ഹിയിലെ വ്യാപാരികളോട് പറഞ്ഞു. ഈ ആവശ്യം അംഗീകരിച്ചുകഴിഞ്ഞാല്‍ 30 സെക്കന്റിനുള്ളില്‍ പ്രതിഷേധങ്ങള്‍ അവസാനിക്കുമെന്നും അദ്ദേഹം എക്‌സിലെ (X) പോസ്റ്റില്‍ കുറിച്ചു.

രാഹുല്‍ ഗാന്ധിയുടെ വാക്കുകള്‍: 'ഡല്‍ഹിയിലെ ഓരോ വ്യാപാരിയോടും, ഞങ്ങള്‍ നിങ്ങളെ സ്‌നേഹിക്കുന്നു, നിങ്ങളുടെ ആശങ്കകള്‍ കേള്‍ക്കുന്നു. സര്‍ക്കാര്‍ മെട്രോ നിര്‍ത്തിവെച്ചു. റോഡുകള്‍ അടച്ചുപൂട്ടി, തലസ്ഥാനം ലോക്ക്ഡൗണിലാക്കി. വോട്ട് മോഷ്ടിക്കപ്പെട്ടാല്‍ നിങ്ങളുടെ കടയോ, സമ്പാദ്യമോ, മക്കളുടെ ഭാവിയോ ഒന്നും സുരക്ഷിതമല്ല. നാലാം പ്രതിയായ ഗ്യാനേഷ് കുമാറിനെ പുറത്താക്കാന്‍ മോദിയോട് പറയൂ, പ്രതിഷേധങ്ങള്‍ 30 സെക്കന്റിനുള്ളില്‍ നില്‍ക്കും' രാഹുല്‍ പറഞ്ഞു.

ഉത്സവ സീസണിലെ വ്യാപാരത്തെ റാലി ബാധിക്കുമെന്നും ഏകദേശം 10,000 കോടി രൂപയുടെ നഷ്ടമുണ്ടാകുമെന്നും ചൂണ്ടിക്കാട്ടി ചേംബര്‍ ഓഫ് ട്രേഡ് ആന്റ് ഇന്‍ഡസ്ട്രിയാണ് (CTI) റാലി നവംബര്‍ 10നു ശേഷത്തേക്ക് മാറ്റിവെക്കാന്‍ രാഹുല്‍ ഗാന്ധിയോട് അഭ്യര്‍ത്ഥിച്ചത്. ഇതിനോടാണ് രാഹുല്‍ പ്രതികരിച്ചത്

ധന്‍തേരാസിനും ദീപാവലിക്കും മുന്നോടിയായി രാംലീല മൈതാനത്തിന് ചുറ്റുമുള്ള മൊത്ത-ചില്ലറ വിപണികളെ റാലി ബാധിക്കുമെന്ന് കാണിച്ച് സി.ടി.ഐ ചെയര്‍മാന്‍ ബ്രിജേഷ് ഗോയലാണ് രാഹുല്‍ ഗാന്ധിക്ക് കത്തയച്ചത്. നവംബര്‍ 6നാണ് ധന്‍തേരാസ്, 8ന് ദീപാവലിയും 10ന് ഭായ് ദൂജും ആഘോഷിക്കും. ഇതിന് മുന്നോടിയായി ഡല്‍ഹിയില്‍ ഏകദേശം 25,000 കോടി രൂപയുടെ കച്ചവടം നടക്കുമെന്നാണ് പ്രതീക്ഷിക്കുന്നത്. ഈ കച്ചവടത്തെ സമരം ബാധിക്കുമെന്നും ഗോയല്‍ പറഞ്ഞു.