പ്രയാഗ്‌രാജ്: അയോധ്യയിലും പ്രയാഗ്‌രാജിലും അന്തരിച്ച വിഎച്ച്പി നേതാവ് അശോക് സിംഘാളിന്റെ പ്രതിമ സ്ഥാപിക്കണമെന്ന് സന്യാസിമാരുടെ ഉന്നത സമിതിയായ അഖില ഭാരതീയ അഖാഡ പരിഷത്ത്. രാമക്ഷേത്ര പ്രസ്ഥാനത്തിന്റെ യഥാര്‍ഥ ശില്‍പ്പി സിംഘാള്‍ ആണെന്ന് പരിഷത്ത് പ്രസിഡന്റ് മഹന്ദ് നരേന്ദ്ര ഗിരി പറഞ്ഞു.

രാമക്ഷേത്രത്തിനു വേണ്ടിയുള്ള പ്രസ്ഥാനം ദശകങ്ങളോളം നീണ്ടുനിന്നതാണെന്ന് അഖാഡ പരിഷത്ത് ജനറല്‍ സെക്രട്ടറി സ്വാമി ഹരി ഗിരി പറഞ്ഞു. ഒട്ടേറെ പേര്‍ക്ക് അതിനായി ജീവന്‍ കളയേണ്ടിവന്നിട്ടുണ്ട്. വിഎച്ച്പി നേതാവായിരുന്ന അശോക് സിംഘാള്‍ സ്വന്തം വീടു തന്നെ രാമക്ഷേത്ര പ്രസ്ഥാനത്തിനായി നല്‍കി. കോത്താരി സഹോദരന്മാര്‍ പൊലീസ് വെടിവയ്പില്‍ മരിച്ചു. ഇപ്പോള്‍ രാമക്ഷേത്ര നിര്‍മാണം തുടങ്ങുന്ന വേളയില്‍ ഇവര്‍ക്കെല്ലാം സ്മാരകം വേണമെന്നാണ് ആവശ്യപ്പെടുന്നതെന്ന് പരിഷത്ത് നേതാക്കല്‍ പറഞ്ഞു.

അയോധ്യയിലും പ്രയാഗ് രാജിലും അശോക് സിംഘാളിന്റെ പ്രതിമ സ്ഥാപിക്കണം. രാമക്ഷേത്ര പ്രസ്ഥാനത്തില്‍ നിര്‍ണായക പങ്കു വഹിച്ചവരുടെ ചിത്രങ്ങള്‍ സ്മാരക സ്തംഭത്തില്‍ കൊത്തിവയ്ക്കണം.  ഇതിനായി പരിഷത്ത് പ്രമേയം പാസാക്കും. ഇത് കേന്ദ്ര സര്‍ക്കാരിനു മുന്നില്‍ സമര്‍പ്പിക്കുമെന്ന് അഖാഡ പരിഷത്ത് പറഞ്ഞു.

രാമക്ഷേത്ര പ്രസ്ഥാനത്തില്‍ പങ്കെടുത്തതിന് പൊലീസ് രജിസ്റ്റര്‍ ചെയ്തിട്ടുള്ള കേസുകള്‍ പിന്‍വലിക്കണമെന്നും നേതാക്കള്‍ ആവശ്യപ്പെട്ടു.