ബോളിവുഡ് നടി ഐശ്വര്യ റായിക്കും മകൾ ആരാധ്യ ബച്ചനും കോവിഡ് സ്ഥിരീകരിച്ചു. ഇരുവരേയും മുംബൈ നാനാവതി ആശുപത്രിയിൽ പ്രവേശിപ്പിച്ചു. ഇന്നലെ അമിതാഭ് ബച്ചനേയും മകൻ അഭിഷേക് ബച്ചനേയും കോവിഡ് സ്ഥിരീകരിച്ചതിനെ തുടർന്ന് ഇതേ ആശുപത്രിയിൽ പ്രവേശിപ്പിച്ചിരുന്നു.

ബച്ചന്‍ കുടുംബത്തിലെ മറ്റ് അംഗങ്ങളായ ജയ ബച്ചന്‍, ശ്വേത അഗസത്യ നന്ദ, നവ്യ നവേലി നന്ദ എന്നിവരുടെ പരിശോധന ഫലം നെഗറ്റീവാണ്. അമിതാഭ് ബച്ചന് കോവിഡ് സ്ഥിരീകരിച്ചതിനെ തുടര്‍ന്നാണ് ഇന്നലെ ബച്ചന്‍ കുടുംബാംഗങ്ങളുടേയും വീട്ടിലെ ജീവനക്കാരുടേയും സാമ്പിളുകള്‍ പരിശോധനയ്ക്ക് എടുത്തത്. ഐശ്വര്യ ഉള്‍പ്പടെയുള്ളവരുടെ ആന്റിജന്‍ ടെസ്റ്റിന്റെ ഫലം നെഗറ്റീവായിരുന്നു.

തനിക്ക് കോവിഡ് സ്ഥിരീകരിച്ച കാര്യം അമിതാഭ് ബച്ചന്‍ തന്നെയാണ് ട്വീറ്ററിലൂടെ പങ്കുവെച്ചത്. താനുമായി കഴിഞ്ഞ പത്തു ദിവസത്തിനുള്ളില്‍ സമ്പർക്കം പുലർത്തിയ എല്ലാവരും പരിശോധന നടത്തണമെന്ന് ബച്ചൻ ആവശ്യപ്പെട്ടു. തൊട്ടുപിന്നാലെ അസുഖം സ്ഥിരീകരിച്ചുവെന്ന് വ്യക്തമാക്കി അഭിഷേകും രം​ഗത്ത് വന്നു. മുംബൈ നാനാവതി ആശുപത്രിയിലാണ് അദ്ദേഹം ചികിത്സയിലുളളത്. ചെറിയ രോഗലക്ഷണങ്ങളുണ്ടെങ്കിലും അമിതാഭ് ബച്ചന്റെ ആരോ​ഗ്യനില തൃപ്തികരമാണെന്നാണ് ആശുപത്രി അധികൃതറിൽ നിന്ന് ലഭിക്കുന്ന വിവരം.