അഹമ്മദാബാദ്: ഗുജറാത്തിലെ സര്‍ക്കാര്‍ ആശുപത്രിയില്‍ കോവിഡ് ബാധിതര്‍ക്കായുള്ള വാര്‍ഡില്‍ മത വിവേചനം. അഹമ്മദാബാദ് സിവില്‍ ആശുപത്രിയാണ് ഹിന്ദുക്കള്‍ക്കും മുസ്ലിംകള്‍ക്കും പ്രത്യേകം വാര്‍ഡ് ഒരുക്കിയത്. സംസ്ഥാന സര്‍ക്കാരിന്റെ നിര്‍ദേശപ്രകാരമാണ് ഇത്തരമൊരു നടപടി സ്വീകരിച്ചതെന്നാണ് ആശുപത്രി അധികൃതരുടെ വിശദീകരണം.
1200 ബെഡ്ഡുകളുള്ള ആശുപത്രിയില്‍, ഹിന്ദുക്കള്‍ക്കും മുസ്ലിംകള്‍ക്കും പ്രത്യേകം വാര്‍ഡ് സജ്ജീകരിച്ചെന്ന് മെഡിക്കല്‍ സൂപ്രണ്ട് ഡോ. ഗുണവന്ദ് എച്ച് റാത്തോഡ് പറഞ്ഞതായി ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തു. എന്നാല്‍ സംഭവം ആരോഗ്യമന്ത്രിയും ഉപമുഖ്യമന്ത്രിയുമായ നിതിന്‍ പട്ടേല്‍ നിഷേധിച്ചു.
ഹിന്ദുക്കളെയും മുസ്ലിംകളെയും പ്രത്യേക വാര്‍ഡ് തിരിച്ചാണ് ചികിത്സിക്കുന്നതെന്ന് കോവിഡ് ബാധിതരും സാക്ഷ്യപ്പെടുത്തുന്നു. എ ഫോര്‍ വാര്‍ഡില്‍ ഉണ്ടായിരുന്ന 28പേരെ സി ഫോര്‍ വാര്‍ഡിലേക്ക് മാറ്റി. എല്ലാവരും ഒരേ മതസ്ഥരായിരുന്നു. എന്തിനാണ് മാറ്റിയതെന്ന് അധികൃതര്‍ വ്യക്തമാക്കിയില്ലെന്ന് ഇവര്‍ പറയുന്നു. രണ്ട് വിഭാഗങ്ങളുടെയും ആശ്വാസത്തിന് വേണ്ടിയാണ് ഇങ്ങനെ ചെയ്തത് എന്നാണ് വാര്‍ഡിലെ ജീവനക്കാര്‍ പറഞ്ഞെന്നും ഇവര്‍ വ്യക്തമാക്കി.
സാധാരണ, സ്ത്രീകള്‍ക്കും പുരുഷന്‍മാര്‍ക്കും വേണ്ടി പ്രത്യേകം വാര്‍ഡ് തയ്യാറാക്കാറുണ്ട്. എന്നാല്‍ ഇത്തവണ മുസ്ലിംകള്‍ക്കും ഹിന്ദുക്കള്‍ക്കും പ്രത്യേകം വാര്‍ഡ് തയ്യാറാക്കിയെന്നും സൂപ്രണ്ട് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates