മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ ഇന്ത്യ മുന്നണി ജനകീയ വിചാരണ നടത്തി പ്രതീകാത്മക ഇംപീച്ച്‌മെന്റ് പ്രമേയം പാസ്സാക്കി. സംസ്ഥാന സ്‌കൂള്‍ കായികമേളയില്‍ തിരുവനന്തപുരത്തിന് ഓവറോള്‍ കിരീടം. ചേരാനെല്ലൂര്‍ വാഹനാപകടത്തില്‍ കേസ് ഡയറിയുമായി അന്വേഷണ ഉദ്യോഗസ്ഥന്‍ ഹാജരാകണമെന്ന് കോടതി ആവശ്യപ്പെട്ടു. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ ഇന്ത്യ മുന്നണി ജനകീയ വിചാരണ നടത്തി പ്രതീകാത്മക ഇംപീച്ച്‌മെന്റ് പ്രമേയം പാസ്സാക്കി. കോണ്‍ഗ്രസ് ദേശീയ അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ വസതിയില്‍, പാര്‍ലമെന്റിന്റെ മാതൃകയില്‍ സംഘടിപ്പിച്ച ചടങ്ങില്‍ ശബ്ദവോട്ടോടെയാണ് പ്രമേയം പാസ്സാക്കിയത്. ആറു കുറ്റങ്ങളാണ് ഇന്ത്യ മുന്നണി ഗ്യാനേഷ് കുമാറിനെതിരെ ചുമത്തിയത്. 

സംസ്ഥാന സ്‌കൂൾ കായികമേളയിൽ തിരുവനന്തപുരം ഓവറോൾ ചാംപ്യൻമാരായി. 2012.3 പോയിന്റോടെയാണ് തിരുവനന്തപുരം സ്വർണക്കപ്പ് കരസ്ഥമാക്കിയത്. തൃശൂർ 965.3 പോയിന്റ് നേടിയ തൃശൂർ രണ്ടാം സ്ഥാനം നേടി. 23.3 പോയിന്റ് നേടിയ മലപ്പുറമാണ് മൂന്നാം സ്ഥാനത്ത്. അത്‌ലറ്റിക്‌സിൽ മലപ്പുറം ജേതാക്കളായി. മലപ്പുറത്തിന്റേത് ഹാട്രിക് നേട്ടമാണ്.

ചേരാനെല്ലൂരില്‍ കാര്‍ ഇടിച്ച് സ്‌കൂട്ടര്‍ യാത്രക്കാരനായ ജയബാലകൃഷ്ണന്‍ മരിച്ച കേസില്‍ കേസ് ഡയറി ഹാജരാക്കാന്‍ അന്വേഷണ ഉദ്യോഗസ്ഥനോട് കോടതി ആവശ്യപ്പെട്ടു. ജുവനൈല്‍ ജസ്റ്റിസ് ബോര്‍ഡിന് പ്രതിയായ 17കാരന് ജാമ്യം അനുവദിക്കാനാവില്ലെന്നും അധികാരപരിധി മറികടന്നും പ്രോസിക്യൂഷൻ ചൂണ്ടിക്കാട്ടി. സാഹചര്യങ്ങള്‍ പരിശോധിക്കാതെയുമാണ് ജാമ്യം അനുവദിച്ചതെന്നും പ്രോസിക്യൂഷന്‍ വാദിച്ചു. ഇന്‍സ്റ്റഗ്രാം ഐഡിയും അതിലെ വിവരങ്ങളും നീക്കം ചെയ്തത് തെളിവ് നശിപ്പിക്കല്‍ അല്ലേ എന്ന് കോടതി ചോദിച്ചു.

ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്സിന് വീണ്ടും നിരാശ. ചെന്നൈയിന്‍ എഫ്സിക്കെതിരായ ദക്ഷിണേന്ത്യന്‍ ഡെര്‍ബി പോരാട്ടം ഗോള്‍രഹിത സമനിലയില്‍ അവസാനിച്ചു. മത്സരത്തില്‍ ഇരു ടീമുകള്‍ക്കും ഗോള്‍ കണ്ടെത്താനായില്ല. നിര്‍ണായകമായ പെനാല്‍റ്റി അവസരം നഷ്ടപ്പെടുത്തിയതും ബ്ലാസ്റ്റേഴ്സിന് തിരിച്ചടിയായി. ആക്രമണത്തിലും പ്രതിരോധത്തിലും ഇരു ടീമുകളും മികച്ച പോരാട്ടം കാഴ്ചവെച്ചെങ്കിലും ഗോള്‍ നേടുന്നതില്‍ പരാജയപ്പെട്ടു.

വാട്സ്ആപ്പ് ഗ്രൂപ്പ് ചാറ്റുകള്‍ കൂടുതല്‍ എളുപ്പത്തില്‍ കൈകാര്യം ചെയ്യുന്നതിനായി പുതിയ നാല് ഫീച്ചറുകള്‍ മെറ്റ അവതരിപ്പിക്കുന്നു. തിരക്കേറിയ ഗ്രൂപ്പുകളിലെ മെസേജുകള്‍ എളുപ്പത്തില്‍ പരിശോധിക്കാനും പ്രധാനപ്പെട്ടവ വേഗത്തില്‍ കണ്ടെത്താനും സഹായിക്കുന്നതാണ് പുതിയ അപ്ഡേറ്റുകള്‍.