പത്തനംതിട്ട: തദ്ദേശ തെരഞ്ഞെടുപ്പില്‍ സ്വന്തം പാര്‍ട്ടിക്കാര്‍ തന്നെ കാലുവാരിയെന്ന് തുറന്നടിച്ച് സിപിഎം മുന്‍ എംഎല്‍എ കെസി രാജഗോപാല്‍. കോഴഞ്ചേരി ഏരിയ സെക്രട്ടറി ടിവി സ്റ്റാലിനാണ് കാലുവാരാന്‍ നേതൃത്വം കൊടുത്തതെന്നും അതുകൊണ്ടാണ് തന്റെ ഭൂരിപക്ഷം 28ല്‍ ഒതുങ്ങിയതെന്നും കെസി രാജഗോപാല്‍ പറഞ്ഞു. ഈ തെരഞ്ഞെടുപ്പില്‍ തന്നെപാര്‍ട്ടി കാര്യമായ വിധത്തില്‍ ഉപയോഗിച്ചില്ല. താന്‍ ഏരിയാകമ്മിറ്റി ക്ഷണിതാവാണെന്ന പരിഗണന പോലും തനിക്ക് ഏരിയാ സെക്രട്ടറി സ്റ്റാലിന്‍ തന്നില്ലെന്ന് കെസി രാജഗോപാല്‍ പറഞ്ഞു.

ചിലയിടങ്ങളില്‍ വീട് കയറാന്‍ തന്നെ വിളിച്ചത് തോമസ് ഐസക് പറഞ്ഞതുകൊണ്ട് മാത്രമാണെന്നും രാജഗോപാല്‍ പറഞ്ഞു. 'ഏരിയാ സെക്രട്ടറിപിടിപ്പുകെട്ടവനാണ്. എന്റെ ഷര്‍ട്ടേല്‍ പിടിച്ചുകയറിവന്നു. അധികാരത്തില്‍ എത്തിയപ്പോള്‍ പത്രവും വായിക്കില്ല, മാസികയും വായിക്കില്ല, സമൂഹത്തില്‍ എന്താണ് നടക്കുന്നതെന്നുപോലും അറിയില്ല. പുള്ളിയെ പുകഴ്ത്തിയാല്‍ അവിടെ വീഴുകയാണ്. ആറന്മുളയില്‍ അടുത്ത തവണ വീണാജോര്‍ജിനെ മാറ്റിയിട്ട് സ്ഥാനാര്‍ഥിയാകാന്‍ നില്‍ക്കുകയാണ്. മെഴുവേലി പഞ്ചായത്തില്‍ നിന്ന് അറിയാവുന്നവര്‍ ആരും വോട്ട് ചെയ്യില്ല.

വീണയും ഐസകും തന്നെ പിന്തുണച്ചത് ആയാള്‍ക്ക് ഇഷ്ടമായില്ല. താന്‍ മത്സരിച്ചാല്‍ പഞ്ചായത്തിലെ 13 വാര്‍ഡെങ്കിലും കിട്ടുമെന്ന് പാര്‍ട്ടി സഖാക്കള്‍ വിശ്വസിച്ചു. കോണ്‍ഗ്രസുകാരും അക്ഷരമറിയുന്നവരും വോട്ട് ചെയ്തുകൊണ്ടാണ് ജയിച്ചത്. ഞാന്‍ എന്നും ജനങ്ങളുടെ പക്ഷത്താണ്. ഇത്തരം കെല്‍പ്പില്ലാത്ത, അധികാരമോഹികളായ സ്റ്റാലിന്‍മാര്‍ ഇനി ഉണ്ടാകരുത്' രാജഗോപാലന്‍ പറഞ്ഞു.

പാര്‍ട്ടി തോല്‍ക്കുമ്പോള്‍ പടക്കം പൊട്ടിച്ച് ആഘോഷിക്കുന്നവനാണ് സ്റ്റാലിന്‍. സിപിഎ നേതൃത്വത്തിന് പരാതി നല്‍കുമെന്നും കെസി രാജഗോപാലന്‍ പറഞ്ഞു. മുന്‍ എംഎല്‍എയായ കെസി വേണുഗോപാല്‍ പത്തനംതിട്ട മെഴുവേലി ഗ്രാമപഞ്ചായത്ത് എട്ടാം വാര്‍ഡില്‍ നിന്നാണ് രാജഗോപാല്‍ വിജയിച്ചത്. 28 വോട്ടുകളുടെ ചെറിയ ഭൂരിപക്ഷത്തിലാണ് കോണ്‍ഗ്രസിന്റെ രാധാ ചന്ദ്രനെ രാജഗോപാല്‍ പരാജയപ്പെടുത്തിയത്.നിലവില്‍ സിഐടിയു സംസ്ഥാന കമ്മിറ്റി അംഗമാണ്.സിപിഎം ശക്തികേന്ദ്രമായിരുന്ന മെഴുവേലി പഞ്ചായത്ത് ഇത്തവണ കോണ്‍ഗ്രസ് പിടിച്ചെടുത്തു. ഇതിനുപിന്നാലെയാണ് സിപിഎമ്മില്‍ പൊട്ടിത്തെറിയുണ്ടായിരിക്കുന്നത്.