തിരുവനന്തപുരം: ഏറെ നാളത്തെ അനിശ്ചിതത്വത്തിനൊടുവില്‍ ഇടതുമുന്നണി യോഗം ചേരാന്‍ ധാരണ. ഈ മാസം 17 ന് എല്‍ഡിഎഫ് യോഗം ചേരാനാണ് തീരുമാനിച്ചിട്ടുള്ളത്. തിങ്കളാഴ്ച വൈകീട്ട് നാലു മണിക്ക് തിരുവനന്തപുരത്താണ് യോഗം. സിപിഐയും സിപിഎമ്മും തമ്മിലുള്ള ആശയവിനിമയത്തിനൊടുവിലാണ് യോഗം ചേരാന്‍ ധാരണയായത്.

നിയമസഭ തെരഞ്ഞെടുപ്പ് കഴിഞ്ഞശേഷം എല്‍ഡിഎഫ് യോഗം ചേര്‍ന്നിരുന്നില്ല. തെരഞ്ഞെടുപ്പ് തോല്‍വിയെക്കുറിച്ച് വിലയിരുത്താന്‍ പോലും മുന്നണി യോഗം ചേര്‍ന്നിരുന്നില്ല. ഏകോപനത്തില്‍ കുറവ്, കൂടിയാലോചനകള്‍ ഉണ്ടാകുന്നില്ല തുടങ്ങിയ പരാതികളും ഘടകകക്ഷികള്‍ ഉന്നയിച്ചിരുന്നു.

പ്രതിപക്ഷ ഉപനേതാവ് പദവിയെച്ചൊല്ലി സിപിഐയും സിപിഐയും തമ്മിലുള്ള തര്‍ക്കവും മുന്നണി യോഗം ചേരുന്നതില്‍ തടസ്സമായിരുന്നു. പ്രതിപക്ഷ ഉപനേതാവ് പദവി കിട്ടിയേ തീരൂവെന്ന് സിപിഐ വാശി പിടിക്കുമ്പോള്‍, നല്‍കാനാകില്ലെന്നാണ് സിപിഎം വ്യക്തമാക്കുന്നത്. ഇതേച്ചൊല്ലി ഇരുപാര്‍ട്ടികളും തമ്മില്‍ കടുത്ത അഭിപ്രായ ഭിന്നതയും നിലനിന്നിരുന്നു.