ആലപ്പുഴ: ക്രിക്കറ്റ് ബാറ്റിനുള്ളില്‍ കഞ്ചാവ് കടത്തിയ യുവാക്കള്‍ അറസ്റ്റില്‍. ചെങ്ങന്നൂര്‍ റെയില്‍വേ സ്റ്റേഷനില്‍ വച്ചാണ് യ യുവാക്കള്‍ പിടിയിലായത്. അറസ്റ്റിലായവര്‍ പശ്ചിമ ബംഗാള്‍ സ്വദേശികളാണ്. 16 ക്രിക്കറ്റ് ബാറ്റുകള്‍ക്കുള്ളില്‍ നിറച്ചനിലയിലായിരുന്നു കഞ്ചാവ്. പിടികൂടിയ കഞ്ചാവ് 15 കിലോയോളം വരുമെന്ന എക്‌സൈസ് സംഘം പറഞ്ഞു.

ക്രിക്കറ്റ് ബാറ്റിനുള്ളില്‍ കഞ്ചാവ് കടത്തുന്നതായി എക്‌സൈസിന് രഹസ്യവിവരം ലഭിച്ചിരുന്നു. തുടര്‍ന്ന് എക്‌സൈസ് സംഘം റെയില്‍വേ സ്റ്റേഷനില്‍ ഇവരെ കാത്തുനില്‍ക്കുകയായിരുന്നു. കസ്റ്റഡിയിലെടുത്ത യുവാക്കളെ ചോദ്യം ചെയ്തുവരികയാണെന്ന് എക്‌സൈസ് അറിയിച്ചു. ആര്‍ക്ക് വേണ്ടിയാണ് ഇത്രയേറെ കഞ്ചാവ് എത്തിച്ചതെന്നതുള്‍പ്പടെ കണ്ടെത്തേണ്ടതുണ്ട്. പ്രതി ബംഗാളില്‍ നിന്ന് സ്ഥിരമായി കഞ്ചാവ് എത്തിക്കുന്നയാളാണെന്ന് എക്‌സൈസ് ഉദ്യോഗസ്ഥര്‍ പറയുന്നു.