കൊച്ചി: വീട്ടുതടങ്കലില്‍ കഴിയുന്ന ഹാദിയയുടെ കൂടുതല്‍ ദൃശ്യങ്ങള്‍ പുറത്ത്. അച്ചന്‍ അശോകന്‍ ക്രൂരമായി മര്‍ദ്ദിക്കുന്നുന്നുവെന്ന ഹാദിയ വെളിപ്പെടുത്തുന്ന വീഡിയോയാണ് പുറത്തുവന്നത്. രാഹുല്‍ ഈശ്വറാണ് ഇതുസംബന്ധിച്ച വീഡിയോയും വെളിപ്പെടുത്തലും  പുറത്തുവിട്ടത്.   അതേസമയം ഇതു സംബന്ധിച്ച കൂടുതല്‍ ദൃശ്യങ്ങള്‍ ഇപ്പോള്‍ പുറത്ത് വിടില്ലെന്നും  രാഹുല്‍ ഈശ്വര്‍ വ്യക്തമാക്കി.

അച്ഛന്‍ കൊല്ലുമെന്ന ഭയം തനിക്കുണ്ട്. ഞാന്‍ നാളെയോ മറ്റന്നാളോ കൊല്ലപ്പെട്ടക്കുമെന്നത് ഉറപ്പാണ്. അച്ഛന്‌ അത്രമേല്‍ ദേഷ്യം വരുന്നുണ്ടെന്ന് തനിക്കറിയാം. അച്ഛന്‍ തന്നെ തല്ലുന്നുതായും ചവിട്ടുന്നതായും രാഹുല്‍ ഈശ്വര്‍ പുറത്തുവിട്ട വീഡിയോയില്‍ ഹാദിയ പറയുന്നു. ഇതുസംബന്ധിച്ച കൂടുതല്‍ ദൃശ്യങ്ങള്‍ പുറത്തുവിടാത്തത് വര്‍ഗീയ പ്രശ്‌നം കണക്കിലെടുത്താണ്. വീണ്ടും കേസ് കോടതി പരിഗണിക്കുന്ന സാഹചര്യത്തില്‍ ഹാദിയ മൂന്നാമത് ഒരിടത്ത് എത്തുന്നതിന് വേണ്ടിയാണ് വീഡിയോ പുറത്തുവിട്ടതെന്നും രാഹുല്‍ പത്രസമ്മേളനത്തില്‍ വ്യക്തമാക്കി

ഹാദിയയെ മരുന്നു നല്‍കി മയക്കി  കിടത്തുകയാണെന്ന ആരോപണവുമായി ഡോക്യുമെന്ററി സംവിധായകന്‍ രാംഗോപാല്‍ മോനോന്‍ നേരത്തെ രംഗത്തെത്തിയിരുന്നു. പിതാവ് അശോകന്‍ ഹാദിയയെ ക്രൂരമായി മര്‍ദ്ദിക്കുന്ന വീഡീയോ രാഹുല്‍ ഈശ്വറിന്റെ കൈവശമുണ്ട്. അതിനെ കുറിച്ച് അന്വേഷിക്കാന്‍ സര്‍ക്കാര്‍ തയ്യാറാകണം. ഡോക്യുമെന്ററി നിര്‍മ്മാണത്തിനിടെ രാഹുലിനെ സന്ദര്‍ശിച്ചപ്പോഴാണ് ക്രൂരമായ മര്‍ദ്ദനത്തിന് ഇരയാകുന്നതായും കൊല്ലപ്പെടുമെന്ന് ഹാദിയ വ്യക്തമാക്കുന്ന വീഡിയോ രാഹുല്‍ തന്നെ കാണിച്ചതായും രാംഗോപാല്‍ പറഞ്ഞിരുന്നു.അതിന് പിന്നാലെയാണ് രാഹുല്‍ വീഡിയോ മാധ്യമങ്ങള്‍ക്ക് നല്‍കിയത്.