തിരുവനന്തപുരം:ബാലാവകാശ കമ്മീഷന്‍ നിയമനവുമായി ബന്ധപ്പെട്ട് ആരോഗ്യമന്ത്രി കെ.കെ ശൈലജയ്‌ക്കെതിരെ അന്വേഷണത്തിന് ഉത്തരവിട്ട് ലോകായുക്ത. ബാലാവകാശ കമ്മീഷനിലെ ക്രമവിരുദ്ധമായ നടപടികള്‍ക്കെതിരേയാണ് അന്വേഷണം. ബന്ധപ്പെട്ട ഫയലുകള്‍ സെപ്റ്റംബര്‍ 14നകം ഹാജരാക്കണമെന്നും നിര്‍ദേശം. സാമഹ്യക്ഷേമ വകുപ്പ് സെക്രട്ടറിക്കെതിരേയും അന്വേഷണം നടത്തും.പ്രതിപക്ഷ നേതാവിന്റെ പരാതിയെത്തുടര്‍ന്നാണ് ലോകായ.ുക്ത ഇപ്പോള്‍ കേസെടുത്തിരിക്കുന്നത്. പ്രഥമദൃഷ്ട്യാല്‍ കേസ് നിലനില്‍ക്കുന്നുവെന്നും ലോകായുക്ത വ്യക്തമാക്കി. 

ബാലാവകാശ കമ്മീഷനില്‍ സ്വതാത്പര്യ പ്രകാരം മന്ത്രി ആളെ കയറ്റി എന്നും ഇതിനായി നിയമനം വൈകിപ്പിച്ചുവെന്നുമാണ് ആക്ഷേപം. ഇതേ കേസില്‍ ഹൈക്കോടതി സിംഗിള്‍ ബെഞ്ച് മന്ത്രിക്കെതിരെ പരാമര്‍ശം നടത്തിയിരുന്നു. കെ.കെ.ശൈലജ മന്ത്രിസ്ഥാനം ദുരുപയോഗം ചെയ്തുവെന്ന നിരീക്ഷണമാണ് ഹൈക്കോടതി നടത്തിയിരുന്നത്.
സിംഗിള്‍ ബെഞ്ച് നടത്തിയ പരാമര്‍ശങ്ങള്‍ നീക്കം ചെയ്യണമെന്നാവശ്യപ്പെട്ട് ശൈലജ കോടതിയെ ലമീപിച്ചിരുന്നു. എന്നാല്‍ പരാമര്‍ശങ്ങള്‍ നീക്കാന്‍ സാധിക്കില്ലായെന്നായിരുന്നു കോടതി നിലപാട്. കേസിലെ ഉത്തരവാദിത്തത്തില്‍ നിന്നും മന്ത്രിക്ക് ഒഴിഞ്ഞുമാറാനാവില്ലെന്നും ക്രിമിനല്‍ കേസ് പ്രതികള്‍ എങ്ങനെ കമ്മീഷന്‍ അംഗമായെന്നും കോടതി ചോദിച്ചിരുന്നു.ഇത് ഉയര്‍ത്തിക്കാട്ടി പ്രതിപക്ഷം കെ.കെ ശൈലജയുടെ രാജി ആവശ്യപ്പെട്ട് പ്രതിഷേധത്തിലാണ്.