മലപ്പുറം: മാലിന്യം കത്തിക്കുന്നതിനിടെയുണ്ടായ സ്‌ഫോടനത്തില്‍ പരിക്കേറ്റയാള്‍ മരിച്ചു. മലപ്പുറം ജില്ലയിലെ കൊളത്തൂരാണ് സംഭവം. കൊളത്തൂര്‍ അമ്പലപ്പടി കടന്നമ്പറ്റ രാമദാസാണ് (62 ) തൃശൂര്‍ ജൂബിലി മിഷന്‍ ആശുപത്രിയില്‍ മരിച്ചത്. 

ക്ഷേത്ര പരിസരത്ത് മാലിന്യം കൂട്ടിയിട്ട് കത്തിക്കുന്നതിനിടെ വെടിമരുന്ന് പൊട്ടിത്തെറിച്ചാണ് ക്ഷേത്രം ഭാരവാഹിയായ രാമദാസിന് പരിക്കേറ്റത്. ഈ മാസം ഒന്നിന് കൊളത്തൂര്‍ അമ്പലപ്പടിയിലെ നരസിംഹമൂര്‍ത്തി ക്ഷേത്ര ഓഫീസ് റൂമിലെ പഴയസാധനങ്ങള്‍ കൂട്ടിയിട്ട് കത്തിക്കുന്നതിനിടെയായിരുന്നു അപകടം. 

അയ്യപ്പന്‍വിളക്കിന്റെ ഭാഗമായി കൊണ്ടുവന്ന  വെടിമരുന്ന്  പഴയസാധനങ്ങളില്‍പെട്ടതാണ് പൊട്ടിത്തെറിക്ക് കാരണം. വയറിനും കൈക്കും പൊള്ളലേറ്റ രാമദാസ് തൃശൂര്‍ ജൂബിലി ആശുപത്രിയില്‍ ചികിത്സയിലായിരുന്നു.