തിരുവനന്തപുരം: കേരളത്തില്‍ വര്‍ധിച്ച തണുപ്പിന് വരള്‍ച്ചയുമായി ബന്ധമില്ലെന്ന് കാലാവസ്ഥ നിരീക്ഷണ കേന്ദ്രം. കൊടും വരള്‍ച്ച വരുന്നതിന് മുന്നോടിയാണെന്നുള്ള തരത്തില്‍ സമൂഹമാധ്യമങ്ങളില്‍ വരുന്ന പ്രചാരണങ്ങളെ കാലാവസ്ഥ കേന്ദ്രം തള്ളി. നാലുദിവസം കൂടി മാത്രമെ അസ്വഭാവികമായ തണുപ്പുണ്ടാകു. ഇന്ത്യ മുഴുവന്‍ അനുഭവപ്പെടുന്ന ശൈത്യത്തിന്റെ ഭാഗമാണിത്. എന്നാല്‍ പതിവില്‍ നിന്നു വിപരീതമായി കുറഞ്ഞ താപനില ശരാശരിയില്‍ നിന്നു 2 ഡിഗ്രി സെല്‍ഷ്യസാണു കുറഞ്ഞിരിക്കുന്നത്.

കോട്ടയം ജില്ലയില്‍ ഒഴികെ മറ്റൊരിടത്തും റെക്കോര്‍ഡ് കുറവ് രേഖപ്പെടുത്തിയിട്ടില്ല. താപനില ശരാശരിയില്‍ ഇന്നലെ ഏറ്റവും കുറവ് രേഖപ്പെടുത്തിയത് പുനലൂരിലും കൊച്ചി വിമാനത്താവളത്തിലുമാണ് 16.5 ഡിഗ്രി സെല്‍ഷ്യസ്. എന്നാല്‍ പുനലൂരില്‍ കുറഞ്ഞ താപനിലയുമായി ബന്ധപ്പെട്ട റെക്കോര്‍ഡ്12.9 ഡിഗ്രിയാണെന്നു കാലാവസ്ഥ നിരീക്ഷണകേന്ദ്രം ഡയറക്ടര്‍ അറിയിച്ചു.