തൃശൂര്‍: സിപിഐ നേതാവിനെ കനാലിൽ മരിച്ച നിലയിൽ കണ്ടെത്തി. കൊടുങ്ങല്ലൂര്‍ മണ്ഡലം സെക്രട്ടറിയായ, മാള സ്വദേശി കുന്നത്തുനാട് ടി.എം.ബാബുവിനെയാണ് കനോലി കനാലില്‍ മരിച്ച നിലയില്‍ കണ്ടെത്തിയത്. 

ഇന്നലെ വീട്ടില്‍ എത്താത്തതിനെ തുടര്‍ന്ന് ഭാര്യ പൊലീസില്‍ പരാതി നല്‍കിയിരുന്നു. പരാതിയിയില്‍ അന്വേഷണം നടത്തി വരുന്നതിനിടെയാണ് ബാബുവിന്റെ മൃതദേഹം ഇന്ന് കനാലില്‍ നിന്ന് കണ്ടെടുത്തത്. കൊടുങ്ങല്ലൂരില്‍ പൊതുപരിപാടികളില്‍ സജീവമായിരുന്നു ബാബു. 

സംഭവത്തിൽ പൊലീസ് അന്വേഷണം ആരംഭിച്ചു. വിശദമായ അന്വേഷണങ്ങള്‍ക്ക് ശേഷം മാത്രമെ മരണത്തില്‍ അസ്വാഭാവികതയുണ്ടോ എന്നത് സംബന്ധിച്ച് പറയാനാകൂവെന്ന് പൊലീസ് അറിയിച്ചു.