ദുബൈ : വാട്‌സ്ആപ്പ് സന്ദേശത്തിലൂടെ അപമാനിച്ചു എന്ന പരാതിയിൽ നഷ്ടപരിഹാരം നൽകാൻ അൽ ഐൻ കോടതി. നഷ്ടപരിഹാരമായി 20,000 ദിര്‍ഹം (465466 രൂപ) പരാതിക്കാരിക്ക് നൽകാനാണ് കോടതി ഉത്തരവിട്ടത്. പരാതിക്കാരിയായ സ്ത്രീക്കെതിരെ മറ്റൊരു യുവതി ആണ് വാട്‌സ്ആപ്പിലൂടെ അപമാനിക്കുന്ന തരത്തിലുള്ള സന്ദേശം അയച്ചത് .

ഈ സന്ദേശങ്ങൾ തന്നെ അധിക്ഷേപിക്കുന്നത് ആണെന്നും ഇത് മൂലം തനിക്ക് മാനസികവും ധാര്‍മികവും ഭൗതികവുമായ നഷ്ടങ്ങള്‍ സംഭവിച്ചതിനാല്‍ 100,000 ദിര്‍ഹം നഷ്ടപരിഹാരവും കോടതി ചെലവുകളും നൽകണമെന്നായിരുന്നു പരാതിക്കാരിയുടെ ആവശ്യം.

ഇതേ പ്രതി തന്നെ സമാനമായ കേസില്‍ ശിക്ഷിക്കപ്പെട്ടിട്ടുണ്ടെന്നും പരാതിക്കാരിയായ യുവതി കോടതിയില്‍ വാദിച്ചു. പ്രതി ചെയ്ത കുറ്റം കോടതിക്ക് ബോധ്യമായതോടെയാണ് നഷ്ടപരിഹാരം നൽകാൻ കോടതി വിധിച്ചത്. സമാന കുറ്റകൃത്യത്തിന് പ്രതി മുൻപ് ശിക്ഷിക്കപ്പെട്ട സംഭവം കൂടി പരിഗണിച്ചാണ് 20,000 ദിർഹം നഷ്ടപരിഹാരം നൽകാൻ കോടതി ഉത്തരവ് ഇട്ടത്.