അബുദാബി: ഇന്ത്യയിൽ നിന്ന് യുഎഇയിലേക്ക് ഈ മാസം 25 വരെ വിമാന സർവീസ് ഉണ്ടാകില്ലെന്ന് എമിറേറ്റ്സ്. ഇന്ത്യ അടക്കം 16 രാജ്യങ്ങളിൽ നിന്നുള്ള യാത്രാവിലക്ക് തുടരുമെന്ന് എയർലൈൻസ് അറിയിച്ചു. നിലവിൽ 21 വരെയാണ് സർവീസ് നിർത്തിവച്ചിട്ടുള്ളത്. 

നേരത്തെ ഈ മാസം 31 വരെ ഇന്ത്യയിൽ നിന്നടക്കം സർവീസ് ഉണ്ടാകില്ലെന്ന് ഇത്തിഹാദ് എയർവെയ്സ് അറിയിച്ചിരുന്നു. ഇന്ത്യയ്ക്ക് പുറമെ പാകിസ്ഥാൻ, ബംഗ്ലാദേശ് എന്നിവിടങ്ങളിൽ നിന്നുമുള്ള സർവീസ് നിർത്തിവച്ചതും നീട്ടിയിട്ടുണ്ട്. വിമാന സർവീസുകൾ പുനരാരംഭിക്കുന്നത് സംബന്ധിച്ച് യുഎഇ വ്യോമയാന മന്ത്രാലയം ഇതുവരെ അറിയിപ്പ് നൽകിയിട്ടില്ല.