കിൻഷസ: കോം​ഗോയിൽ എബോള വൈറസ് പൊട്ടിപ്പുറപ്പെട്ടതായി ലോകാരോ​ഗ്യ സംഘടന പ്രസ്താവിച്ചതിന് പിന്നാലെ രാജ്യത്ത് വൈറസ് ബാധിച്ച് രണ്ടാം മരണവും റിപ്പോർട്ട് ചെയ്തു. കഴിഞ്ഞ ​ദിവസം ആദ്യ മരണം റിപ്പോർട്ട് ചെയ്ത ബാൻഡകയിൽ തന്നെയാണ് രണ്ടാമത്തെ മരണവും സ്ഥിരീകരിച്ചിരിക്കുന്നത്. 

25കാരിയായ യുവതിയാണ് മരിച്ചത്. പന്ത്രണ്ട് ദിവസം മുമ്പാണ് ഇവർക്ക് ലക്ഷണങ്ങൾ കണ്ടെത്തിയത്. എബോള ബാധിച്ച് ആദ്യം മരിച്ച രോ​ഗിയുടെ അടുത്ത ബന്ധു ആണ് ഇപ്പോൾ മരണമടഞ്ഞത്.

എബോള ബാധ മൂലം കഴിഞ്ഞ ദിവസം ഒരു രോ​ഗി മരിച്ചതിനു പിന്നാലെയാണ് ഡെമോക്രാറ്റിക് റിപ്പബ്ലിക് ഓഫ് ​കോം​ഗോ എബോള പൊട്ടിപ്പുറപ്പെട്ടതായി പ്രഖ്യാപിച്ചത്. 2018നു ശേഷം ആറാം തവണയാണ് കോം​ഗോയിൽ എബോള ബാധയുണ്ടാകുന്നത്.

ബാൻഡകയിൽ നിന്നുള്ള 31കാരനായ രോ​ഗിയാണ് ഈയാഴ്ച ആദ്യം എബോള മൂലം മരണമടഞ്ഞത്. ഏപ്രിൽ അഞ്ച് മുതൽ രോ​ഗ ലക്ഷണങ്ങൾ കണ്ടിരുന്നു. ഒരാഴ്ചയോളം വീട്ടിൽ ചികിത്സിച്ചതിനു ശേഷം പ്രാദേശിക ആരോ​ഗ്യ സംവിധാനത്തിന് കീഴിൽ ചികിത്സയ്ക്കെത്തി. ഏപ്രിൽ 21നാണ് രോ​ഗിയെ കൂടുതൽ ചികിത്സയ്ക്കായി എബോള ട്രീറ്റ്മെന്റ് സെന്ററിലേക്ക് മാറ്റിയത്. അതിതീവ്ര പരിചരണ വിഭാ​ഗത്തിൽ ചികിത്സയിലായിരുന്ന രോ​ഗി തൊട്ടടുത്ത ദിവസം മരിച്ചു. 

രോ​ഗിയുടെ ലക്ഷണങ്ങളിൽ നിന്ന് എബോള ബാധിച്ചതായി സംശയം തോന്നിയ ആരോ​ഗ്യ പ്രവർത്തകർ ഉടൻ തന്നെ സാംപിളുകൾ പരിശോധനയ്ക്ക് അയച്ചു. ഉറവിടം സംബന്ധിച്ച അന്വേഷണം നടന്നു വരികയാണെന്ന് ​ഗ്ലോബൽ ഹെൽത്ത് ഏജൻസി അറിയിച്ചു. 

കോം​ഗോയിൽ എബോള വ്യാപനത്തെ തടയാനുള്ള പരിശോധനകളും സമ്പർക്ക പട്ടികകളും തയ്യാറാക്കി വരികയാണ്. ഒപ്പം വാക്സിനേഷൻ യജ്ഞങ്ങളും ഉടൻ ആരംഭിക്കും.

എബോള നിയന്ത്രണത്തിൽ കോം​ഗോയിലെ ആരോ​ഗ്യ പ്രവർത്തകർ ലോകത്തിലെ മറ്റാരേക്കാളും പ്രവർത്തി പരിചയമുള്ളവരാണ് എന്നതാണ് പ്രതീക്ഷ പകരുന്ന വാർത്ത എന്ന് കഴിഞ്ഞ ദിവസം ലോകാരോ​ഗ്യ സംഘടനയുടെ ആഫ്രിക്കയിലെ റീജിയനൽ ഡയറക്ടർ ഡോ. മറ്റ്ഷിദിസു മൊയേറ്റി പറഞ്ഞു. 

ബാൻഡകയിലുള്ള ഭൂരിപക്ഷം പേരും ഇതിനകം എബോളയ്ക്കെതിരായ വാക്സിൻ സ്വീകരിച്ചിട്ടുള്ളവരാണ്. ഇത് രോ​ഗത്തിന്റെ ആഘാതം കുറയ്ക്കുമെന്നും മറ്റ്ഷിദിസു മൊയേറ്റി വ്യക്തമാക്കി. 2020ൽ എബോള പൊട്ടിപ്പുറപ്പെട്ടപ്പോൾ വാക്സിൻ സ്വീകരിച്ചിട്ടുള്ളവർക്കെല്ലാം വീണ്ടും വാക്സിൻ നൽകുമെന്നും അദ്ദേഹം കൂട്ടിച്ചേർത്തു.

ഈ വാർത്ത കൂടി വായിക്കാം

മനുഷ്യരില്‍ എച്ച്3എന്‍8 പക്ഷിപ്പനിയുടെ ആദ്യ കേസ് ചൈനയില്‍; 4 വയസുകാരന് രോഗം

സമകാലിക മലയാളം ഇപ്പോൾ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾ അറിയാൻ ക്ലിക്ക് ചെയ്യൂ