ബാങ്കോക്ക്: തായ്‌ലാന്‍ഡില്‍ സ്വവര്‍ഗ വിവാഹത്തിന് നിയമ സാധുത. ചൊവ്വാഴ്ച സെനറ്റ് വന്‍ ഭൂരിപക്ഷത്തോടെയാണ് ബില്ലിന് അംഗീകാരം നല്‍കിയത്. സെനറ്റിലെ 152 അംഗങ്ങളില്‍ 130 പേര്‍ ബില്ലിനെ അനുകൂലിച്ചപ്പോള്‍ 4 പേര്‍ എതിര്‍ത്തു. 18 പേര്‍ വിട്ടുനിന്നു. സ്വവര്‍ഗ വിവാഹത്തിന് അംഗീകാരം നല്‍കുന്ന ആദ്യ കിഴക്കന്‍ ഏഷ്യന്‍ രാജ്യവും മൂന്നാമത്തെ ഏഷ്യന്‍ രാജ്യവുമാകും തായ്‌ലന്‍ഡ്.

ഇതോടെ തായ്‌വാനും നേപ്പാളിനും ശേഷം സ്വവര്‍ഗ വിവാഹം അനുവദിക്കുന്ന ഏഷ്യയിലെ മൂന്നാമത്തെ രാജ്യമായി തായ്ലന്‍ഡ് മാറും. ബില്ലിന് തായ്‌ലന്‍ഡ് രാജാവിന്റെ അംഗീകാരം ആവശ്യമാണ്. അതിന് ശേഷം ബില്‍ നിയമമായി മാറും. നിയമപരവും സാമ്പത്തികവും വൈദ്യശാസ്ത്രപരവുമായി എല്ലാ കാര്യത്തിലും പങ്കാളികള്‍ക്ക് തുല്യ അവകാശമാണ് ബില്ലില്‍ പറയുന്നത്. പുരുഷന്‍മാര്‍ , സ്ത്രീകള്‍ എന്നീ വാക്കുകള്‍ വ്യക്തികള്‍ എന്നും ഭര്‍ത്താവ്, ഭാര്യ എന്നീ വാക്കുകള്‍ വിവാഹ പങ്കാളികള്‍ എന്നിങ്ങനെ മാറ്റാനും ബില്ലില്‍ പറയുന്നുണ്ട്.

യാഥാസ്ഥിതിക മൂല്യങ്ങള്‍ വച്ചുപുലര്‍ത്തുന്ന തായ് സമൂഹം വിവാഹ സമത്വ നിയമം പാസാക്കുന്നതിനായി ദശാബ്ദങ്ങളായുള്ള പോരാട്ടമാണ് ഇതോടെ അവസാനിച്ചത്. ബില്ലില്‍ എല്‍ജിബിടിക്യൂ കമ്മ്യൂണിറ്റിക്ക് അനുകൂലമായ നിയമങ്ങളും ഉറപ്പുവരുത്തുന്നുണ്ട്.