തെങ്ങിൻമൂട്ടിലേക്ക്

ചാഞ്ഞിരുന്ന്

എളിക്കൂട് തുറന്നെടുത്ത ബീഡി

ലിപ് ലോക്കിലിട്ടു

തീ പകർന്ന്

കാഴ്ചക്ക് വെളിവേകി

സാരിത്തുമ്പും

ചുരുൾ മുടിയും പറത്തി

കുഴഞ്ഞാടിയ

ആദ്യപുകക്കു പിന്നാലെ

മനസ്സു ചഞ്ചലിച്ചതിൽ

തന്നെത്തന്നെ പുച്ഛിച്ചു

തെറ്റുതിരുത്തി

വീണ്ടുമൊന്നിരുത്തി വലിച്ചു

വീഴ്ചയുടെ കാരണങ്ങളിലേക്ക്

ചൂഴ്ന്നിറങ്ങി

വർഗീയധ്രുവീകരണം

മധ്യവർഗ അരാഷ്ട്രിയത

നവമാധ്യമങ്ങളുടെ ദുഷ്പ്രചരണം….

വലതുപക്ഷവ്യതിയാനം

അണികളുടെ കൊഴിഞ്ഞുപോക്ക്

ന്യൂനപക്ഷ പ്രീണനം …

വൈരുദ്ധ്യങ്ങളുടെ

സംഘർഷം താങ്ങാനാവാതെ

തലച്ചോറുചുറ്റി

പുറത്തചാടിയ

രണ്ടാമത്തെ പുക

നീണ്ടതാടിരോമങ്ങൾ വിറപ്പിച്ച്

പുരുഷാകൃതി പൂണ്ടു

മുന്നിൽ നിന്നു

നെഞ്ചോടു ചേർത്തുവച്ചിട്ടുള്ള

താടിക്കാരുടെ

ചില്ലിട്ട ചിത്രങ്ങൾ

ഒന്നൊന്നായി പൊടിതട്ടി

വിശകലനം തുടങ്ങി

മാർക്സ് , ലെനിൻ, ചെ

ഹോചിമിൻ, എംഗൽസ്

കാസ്ട്രോ,  …..

വിരലുകളുടെ പീഡനത്തിൽ

ഞെളിപിരി കൊണ്ട ബീഡി

തലപുകഞ്ഞു ശോഷിച്ചു

ധീരരക്തസാക്ഷികളെ

മനസ്സിലുറപ്പിച്ച്

സത്യംവെളിപ്പെടണേയെന്നു

 കണ്ണടച്ചു തുറന്നപ്പോൾ

വയറെത്തുംതാടി

കട്ടിക്കണ്ണട

നെറ്റിപ്പൊട്ട്

മുട്ടറ്റം നിക്കറ്

മുട്ടൻമുളവടി ….

ഫാസിസംതുലയട്ടെ

വിപ്ലവം ജയിക്കട്ടെ

തുടങ്ങിയ ഉശിരൻമുദ്രാവാക്യങ്ങൾ

തൊണ്ടക്കുഴിയിലെ

കെട്ടുപൊട്ടിച്ച്

പറപറപ്പൻ ചുമയായി

ചിന്നിച്ചിതറി

മൂന്നു ചുവട് തൊങ്കി

ലോഡുസൈക്കിളിൻ്റെ

പൊന്തിയ സീറ്റിൽ

ചന്തിയുറപ്പിച്ച്

വാലിന്മേൽച്ചിറ ഷാപ്പ് ലാക്കാക്കി

വൈരുദ്ധ്യത്തിൽ നിന്നും

യാഥാർത്ഥ്യത്തിലേക്ക്

പെടലിളക്കി

വലിച്ചെറിഞ്ഞ കുറ്റിയിലെ

അവസാനത്തെ പുക

പത്തിവിടർത്തി

നാവിട്ടിളക്കി

പിന്നാലെ പാഞ്ഞു