കക്ഷത്തിലുള്ളൊരു ജീവിതം പോകാതെ

ഉത്തരത്തീന്നെടുക്കേണം കവിതയെ,

ഉത്തരത്തിൻമേൽ ഇരിപ്പതൊരു തോന്നൽ,

കക്ഷത്തിലുണ്ടെന്നതും മറ്റൊരു തോന്നൽ.

കക്ഷത്തിലുള്ളതാം ജീവിതം കൈവെടി-

ഞ്ഞുത്തരത്തിൽ തപ്പിനോക്കീ കവിതയെ.

പൊട്ടിത്തകർന്നങ്ങു വീഴ്‌വതും സങ്കടം

ഉത്തരത്തിൽ കൊത്തുവാനോങ്ങിനില്‍പ്പതും...

കിക്കിലുക്കം കിക്കിലുക്കം ചിലയ്ക്കാതെ

ഉത്തരത്തിൽ ചത്തിരിപ്പു വാക്കിൻകൂട്ടം

ഏതറ തൻ പൂട്ടിനുള്ളിൽ അതിൻ പ്രാണൻ?

ഏതു നിലവറത്താഴിൽ അതിൻ ജീവൻ?

‘ഉൾഭയം’ എന്ന തലക്കെട്ട് കെട്ടവേ

ഉൾഭയത്തിൻ ചില്ലടർന്നങ്ങുഭയമായ്.